Shymkentte aǵaly-inili egiz balalar joǵaldy. 17 jasar jetkinshekter osydan 4 kún buryn, juma kúni Qabanbaı batyr kóshesinde úıden shyqqannan keıin qatyp oralmaǵan, - dep habarlaıdy Qamshy.kz Otyrar.kz - ke silteme jasap.
Sodan izim-qaıym bolǵan perzentterin jalǵyzbasty anasy áli kúnge tapqan joq.Gúlmıra Sadyqovanyń kórshilerimen birge kóshe kezip, perzentteriniń sýreti bar paraqshalardy aıaldamalar men kópshilik oryndarǵa japsyryp júrgenine, mine, tórtinshi kún. Aıtýynsha, qos perzenti, aǵali-inili Asan men Úsen Sadyqovtar juma kúni úıinen shyǵyp ketkennen beri áli oralmaǵan.
-Janymdy shúberekke túıip otyrmyn. Kólik qaǵyp kete me, áldebir qaraqshylardyń qolyna túsip, olar balapandarymdy atyp tastaı ma degen úreı boıymdy bılep aldy. Aman bolsa eken! Tórt kúnnen beri nár tatpadym, kóshede júrmin, ár adamnyń qasyna baryp, surastyryp jatyrmyn. Eshqandaı habar-oshar joq. Ál Farabı aýdandyq polısıa bólimine baryp, aryz jazdym. Habarlasamyz, 2 saǵattan soń úıińizge baryp, balalardyń júrgen jerin anyqtap, sýretin alýymyz kerek dep edi. Biraq, kelgen joq, habarlaspady da. Qońyraý shalsam, tutqany kótermeıdi, - deıdi Asan men Úsenniń anasy Gúlmıra Sadyqova.
Kóz jasy kól bolǵan anasynyń aıtýynsha, perzentteri Asan men Úsen týǵannan júıke júıesi dertine shaldyqqan, İİ top múgedegi. Jalǵyzbasty áıel buǵan deıin balalary Tólebı aýdanyndaǵy arnaıy ınternatta tárbıelendi deıdi. Al 2 jyldan beri osy jaldamaly páterdi anasy jáne inilerimen birge panalap júrgen olardyń búginde derti asqynyp, óz qımyl-ısharalaryna jaýap bere almaıtyn kezderi de bolady eken.
-Qaladaǵy júıke júıesi aýyratyn adamdarǵa arnalǵan aýrýhanaǵa talaı ret bardym. Ótken aıda da baryp, perzentterimdi emdeý kerek degen edim, oryn joq dep jatqyzbady. Sosyn dári-dármek satyp alyp berdim. Biraq, esh nátıje bolǵan joq! Ózim de İİ top múgedegimin. 10 kún úıde bolsam, 20 kún aýrýhana tósegine tańylamyn. Ol kezde balalarǵa úlken qyzym bas-kóz bolady. Memleketten tólenetin qarjy túkke de jetpeıdi. Páteraqy, as-aýqat pen dárige tóleımin, - deıdi Gúlmıra Sadyqova.
Gúlmıra Sadyqovanyń aıtýynsha, qos balasy buryn da birneshe ret osylaı joǵalyp, tabylǵan. Biraq qaı jaǵdaıǵa da quzyrly organ — Ál Farabı polısıa bólimi «Esalań jetkinshekterge jaýap bermeımiz» dep, bastaryn ala qashady eken. Tártip saqshylary biz habarlasqanda da «Olar aýrý balalar ǵoı» dep, qysqa jaýap qaıyrdy. Endi polısıadan kúderin úzgen ana kómekti jerlesterinen kútip otyr. Perzentteriniń tabylatynyna senedi.
