Elshiliktiń laýazymdy qyzmetkerleri ul-qyzdarynyń oqý ornyn Erdoǵannyń málimdemesinen keıin dereý aýystyrýǵa májbúr bolypty, - dep habarlaıdy Qamshy.kz KTK arnasyna silteme jasap.
Iaǵnı Túrkıa prezıdenti maqtaýly bilim ordalary Amerıkadan pana tapqan áıgili ıslam nasıhattaýshysy Fethýllah Gúlenmen tyǵyz baılanysty dep jaqtastaryn shetinen tutqyndap jatqany belgili. Al myńdaǵan shákirt bilim alyp júrgen qazaq-túrik lıseılerin qadaǵalaıtyn KATEV qory men Bilim mınıstrligi túrik elshisine jaýap qaıtaryp, mektepterdiń birde biri jabylmaıtynyn málimdedi. Astanadaǵy qazaq-túrik lıseıinde Túrkıaǵa qatysty eshqandaı belgi joq. Týy túgili, túrikshe bir jazý tappaısyz. Kireberiske qazaqtyń kók baıraǵy qoıylyp, janynda eltańba men ánurannyń sózi jazylǵan taqtaısha ilýli tur. Jánibek pen Kereı bastaǵan áıgili qazaq handarynyń músini de tórden oryn tapqan. Mundaǵy oqýshylar Gúlenniń kim ekenin de bilmeıdi. Esesine, ár kabınette Nazarbaevtyń naqyldary ilinip, jastyq shaǵy, ómirbaıany, kitaptary men «Máńgilik el» jaıly aqparat kóp.
Jalpy, bul bilim ordasyn 24 jyl buryn Túrkıanyń 8-shi prezıdenti Turǵyt Ózaldyń ózi kelip ashyp, keıin Súleımen Demırel, Abdýlla Gúlge deıin bas suǵyp maqtap ketken. Alaıda Erdoǵandy taqtan taıdyra jazdaǵan tóńkeristen soń, resmı Ankara aıaq astynan qubylyp, oppozısıoner, áıgili dinı ǵalym Gúlen qarjylandyrady degen jeleýmen álem elderindegi lıseılerdi jabýdy talap etip, Qazaqstanǵa da qyr kórsete bastady. Bir qyzyǵy, Erdoǵannyń qaharynan qoryqty ma, Astanadaǵy túrik elshiliginiń dıplomattary da ul-qyzdaryn elıtalyq mektepten dereý alyp ketipti. Al QTL-dardy basqaratyn KATEV qory Túrkıaǵa esh qatysy joqtaryn, tek Bilim mınıstrligine baǵynatynyn, mektepte dindi dáriptemek turmaq, namaz oqýǵa tyıym salynǵanyn aıtty.
-Bizdiń eshqandaı syrtqy memleket, úkimet uıymdarmen nemese jeke tulǵalarmen eshqandaı qarym-qatynasymyz joq. Biz tek qana Qazaqstan Respýblıkasynyń bilim zańnamasyndaǵy zaıyrly bilim berýmen aınalysamyz. Bizdiń bilim oshaqtaryn eshqandaı saıasatqa aralastyrýdyń qajeti joq dep oılaımyn, - deıdi KATEV halyqaralyq qoǵamdyq qorynyń prezıdenti Darhan Óte.
Tanymal AT mamany Arshat Orazov 1997 jyly Aqtóbegi qazaq-túrik lıseıin úzdik bitirgen darynnyń biri. Endi arada 20 jyl ótkende, ózi bilim alǵan mektepte pantúrkızm, dindi aralastyryp, bolashaqta túrik elıtasyna qyzmet etetin kadr tárbıeleıdi eken degen áńgimeni estigende jaǵasyn ustaǵan.
-SHynymdy aıtsam, Gúlen degen kisi baryn bilgen joqpyn. Ol jaqta din týraly eshteńe aıtylǵan joq. Lıseıde eń birinshi orynǵa sol bilimdi qoıady. Bala ósirip otyrǵan ata-ana retinde balamyzdy sol lıseıge bergimiz keledi, - deıdi qazaq-túrik lıseıiniń túlegi Arshat Orazov
Gúlenniń ilimin nasıhattaıdy dep Túrkıa Afrıka elderin aıtpaǵanda kórshiles Qyrǵyzstanǵa qyr kórsetip jatyr. Búgin Prezıdent Atambaevtyń ózi ishki isimizge aralaspańdar dep azýyn kórsetti. Sondyqtan saıasattanýshylar da resmı Astananyń batylyraq qımyldaǵanyn qalaıdy.
-Bul endi shynyn aıtý kerek, Túrkıa memleketine de, túrik dıplomatıasyna da abyroı ápermeıtin málimdeme boldy. Qazaq-túrik lıseıi degen aty bolmasa, negizinen memlekettik mekemeler. Onyń artynan Gúlendi izdeý, nemese basqany izdeý aqylsyzdyq, - deıdi saıasattanýshy Aıdos Sarym.
Al Túrkıa elshisiniń ótken aptadaǵy «shuǵyl sheshim shyǵaryńdar» degen málimdemesinen keıin Bilim mınıstrligi 27 qazaq-túrik lıseıiniń jabylmaıtynyn qadap aıtty. Iaǵnı 1-shi qyrkúıekte 10 myńnan astam osyndaı bilim oshaǵynyń shákirtteri oqýyn jalǵastyra beredi.
-Mundaǵy jumys istep jatqan muǵalimderdiń 90-paıyzdan astamy bizdiń Qazaqstannnyń azamattary. Sondyqtan syrttan basqa da bir uıymdardyń basqa memlekettiń aralasýyna quqyǵy joq dep sanaımyz, - deıdi ilim jáne ǵylym mınıstrliginiń baspasóz hatshysy Áıgerim Álibekova.
Osy kezde elimizdiń Syrtqy ister mıınıstrligi halyqaralyq janjal shyqpasyn dep otyr ma, ázirge únsiz. Desek te, keıbir saıasattanýshylar eldi dúrliktirgen Túrkıa elshisiniń málimdemesinen keıin ony, syrtqy ister vedomstvosy shaqyrtyp alyp, túsinikteme talap etýi kerek edi deıdi. Jańa oqý jylynyń bastalýyna bir aı qalǵanda myńdaǵan shákirt pen ata-analardy tolǵantyp qoıǵan shýdan soń KATEV qory Bilim mıınıstriligine qazaq-túrik lıseıiniń ataýyn ózgertý týraly usynys jasamaq.
