Qaraǵandynyń Qarqaraly aýdanyndaǵy Qasym Amanjolov aýylynyń ákimderi shyrt uıqyda jatqanda,  jergilikti halyq joldardy óz kúshterimen qalypqa keltirip jatyr. Úlken-kishi demeı qoldaryna kúrek alǵan halyq jerdi tańǵy saǵat toǵyzdan bastap kún batqanǵa deıin  tegisteıdi eken, - dep habarlaıdy Qamshy.kz 31 arnaǵa silteme jasap.

«Óıtpeske amalymyz qalmady», deıdi kópshilik. Óıtkeni, jol mashaqatyn basshylarǵa san márte aıtqanymen, saýsaq ushyn qımyldatqan jan baıqalmapty. Tipti, jergilikti ákim kómek túgili tehnıka da bermeı qoıǵan. 

- Meniń estýimshe jolǵa úsh jylda bir ret 90 mıllıon teńge bólinedi eken. Al sol qarajat nege tekserilmeıdi. Aqyrynda pensıaǵa aýyzdaryn ashyp, jol jóndeımiz dep aqsha jınady. Aýyl jigitteri bolsa, at salysyp, jeńil-jelpi jóndeý ótkizip jatyr. Al osyǵan  bir shara bola ma, joq pa?, - deıdi Qarqaraly aýdanynyń turǵyny Maırash Óserova. 

Sondyqtan osydan úsh jyl buryn ǵana jóndelgen 45 shaqyrym joldy qalypqa keltirýge halyq aqshany da óz qaltalarynan shyǵarypty. Qasym Amanjolov aýylyndaǵy 2000 turǵynnan shamamen 200 myń teńgedeı qarajat jınalypty. Biraq tas joldy asfálttaýǵa sonda da aqsha jetpeıdi dep otyr. Aqyry halyq qum tósep, joldyń shuryq-tesikterin jamap jatyr. Al jergilikti mamandar 45 shaqyrym joldy jóndeý úshin shamamen 300 mıllıon teńge jumsalady dep otyr. Osydan úsh jyl buryn jóndelgen joldy qalypqa bıyl keltirmeımiz deıdi. Sebebi búdjette aqsha tapshy.

- «Jol qartasy-2020» baǵdarlamasy aıasynda Qarqaraly Qasym Amanjolov 45 shaqyrymdy quraıtyn tas jolyna ortasha jóndeý jumystaryn júrgizýge 302 mıllıon teńge búdjettik ótinim joldanǵan bolatyn. Búgingi kúni qarjy bólinbedi, - deıdi Qarqaraly aýdany ákimshiliginiń TKSH jolaýshylar kóligi avtomobıldi joldar, qurylys jáne turǵyn úı ınspeksıasy bólimi sektorynyń meńgerýshisi Qumar Batyrbekov.