Búgingi túnde, tamyzdyń 3-nen 4-ne qaraǵan túni, saǵat 00.45-te Qazaqstannyń sporttyq ómirine qatysty tarıhı oqıǵa bolady. Shotlandıanyń Glazgo qalasyndaǵy «Seltık Park» stadıonynda ÝEFA chempıondar lıgasynyń úshinshi biliktilik raýndy aıasynda «Astana» men «Seltık» komandalary baq synasady. Fýtbol tamashasyn «Qazaqstan» telearnasy tikeleı efırden kórsetedi. Jasyratyny joq, bul oıyn burynǵy oıyndardan ózgerek. Óıtkeni, eki eldiń jankúıerleri júrekteri lúpildep, osy fýtbol toıynyń boladysyn taǵatsyzdana kútip otyr. Bul Chempıondar Lıgasynyń toptyq kezeńine qaı komandanyń shyǵatynyn anyqtaıtyn sát. Olaı bolsa, mılıondaǵan qazaqstandyqtar búgingi túnde teledıdar ekranyna telmirip, óz komandasynyń jeńisin tileıtin bolady. Qazaqsha aıtqanda, úıde otyryp, «taqym qysatyn», «bórkimizdi aspanǵa atatyn» kez.
Jaratqanǵa jalbarynyp, búgingi oıynda «Astanaǵa» sondaı rýhymyzdy asqaqtatyn jeńis tileımiz! Keshegi «Astana-Arena» tórindegi eki komandanyń sharshy alańda kezdeskeni áli esimizde. Esep 1:1 bolyp, oıyn teń aıaqtaldy. Tumandy Albıonnan kelgen jigitter de, astanalyq fýtbol arlandary da bir-birimen berispedi. Bizdiń oıymyzsha, búgingi oıyn da qyzyq pen qýanyshqa, úmit pen kúdikke toly bolary sózsiz. Árıne, shotlandtyqtar óz alańynda sál de bolsa basymdyqqa ıe bolar. Biraq bap shappaıdy, baq shabady. Bálkim, bizdiń «Astananyń» baǵym basym túser. Qalaı bolaryn, ýaqyt pen oıyn kórsetedi.
Endi oıynnyń barysyna ózimizshe az-maz boljam jasap kóreıik. Bul joly Brendan Rodjers te, Stanımır Stoılov ta oıynnyń taktıkalyq tásilin ózgeshe quratyny anyq. Shotlandtyqtar kóbinese shabýylǵa kóńil bólse, astanalyqtar qorǵanysty berik qylýǵa tyrysyp baǵady. Alaıda oıynnyń órnegi basqasha da túzilýi ábden múmkin. Eń bastysy, astanalyqtar shotland jankúıerleriniń shýylynan, ysqyryǵynan báseńsip qalmaýy qajet. Sebebi, «Seltık» óz alańynda, óz jankúıerleriniń aldynda aıbarlanyp oınaıtyny anyq. Qysqasy, bizdiń komanda ahýaldyń qandaı senarımen órbıtinine de daıyn bolýy tıis.
«Jaqsy sóz – jarym yrys» deıdi qazaq. Búgingi oıynda «Astana» «Seltıkti» 2:0 nemese 1:0 esebimen utady dep boljapty býkmekerler. Qazaq mundaıda «aýzyńa maı, astyńa taı» demeı me?!. Eger alda-jalda oıyn osyndaı eseppen aıaqtalatyn bolsa, «Astana» Chempıondar Lıgasynyń pleı-off kezeńine ótedi. Bul qıal emes, aqtalatyn úmit. Mundaı úmitti biz tek chempıonymyz – «Astanaǵa» ǵana arta alamyz. Bizdiń chempıonymyz chempıondar lıgasynda naǵyz chempıondarsha oınaýy tıis! Basqasha bolýy múmkin emes. Ol úshin ár fýtbolshymyzdyń júreginde jeńiske degen úmit pen senim bolýy qajet. Sonda ǵana jeńistiń tátti dámin tatamyz.
Nelikten bizdiń komanda jeńiske jetýi kerek? Munyń birneshe sebepteri bar. Birinshi sebep – «Seltık» ÝEFA chempıondar lıgasynyń qorǵany berik, temir qamaly ispettes komanda. Eger búgin bul qamaldy buza almasaq, ári qaraı jolymyz jabylady. Qalaı bolǵanda da, bizdiń fýtbolshylarymyz ne 1:0 nemese 2:0 esebimen jeńiske jetip, tipti bolmaǵanda teń oıynmen úılerine qaıtqany abzal. Ekinshi sebep – «Seltık» - ońaı shaǵylatyn jańǵaq emes. Bul klýb eýro kýboktarynyń tarıhynda erekshe, bedeldi oryn alatyny barshaǵa málim. Oǵan qosa, Shotlandıanyń chempıony degen abyroıly ataqty 47 ret ıelengen komanda. 36 ret kýbokty jeńip alypty. «Astanalyqtardyń» bapkeri Stanımır Stoılov aıtqandaı, «bul qandaı da bir aýyldan shyqqan eleýsiz komanda emes».
Jeńiske úmit artýymyzdyń taǵy bir sebebi bar. Úshinshi irikteý raýndyna jol tartqan «Astananyń» quramyna Erıch, Shomko, Logvınenko, Shıtov, Beısebekov, Anıchıch, Kanáns, Taǵybergen, Nurǵalıev, Tvýması, Kabananga sıaqty oıynshylar endi. Oıyndy osy qurammen bastaımyz. Árıne, «Manchester Sıtıden» kelgen jas talant Dıma Shomkoǵa, Nenad Erıchke erekshe úmit artamyz. Eń bastysy, bizdiń oıynshylar da shetinen «sen tur, men ataıyn». Olaı bolsa, jeńisti qoldan bermeıtini aıdan anyq. Olar «Seltık Parkte» jattyǵý oıynyn ótkizip úlgerdi. Aıta ketelik, bul stadıon baıyrǵy ǵımarattardyń biri. 1892 jyly salynǵan. 60 myńnan astam adam syıǵyza alady. Artqa sheginis jasasaq, bul stadıonǵa qazaqstandyq fýtbolshylar 2013 jyly taban tıgizdi. Qaraǵandylyq «Shahter» men glazgolyq «Seltıktiń» sharshy alańdaǵy aıqasy osy jerde ótken bolatyn. Biraq, ol kezde «Shahterdiń» saǵy synyp, shotland komandasynan 0:3 esebimen utyldy. Ol oıyn basqa, búgingi oıyn bir basqa.
Búgingi oıynda bizdiń fýtbolshylarǵa jeńiske degen senim men muqalmas rýh qajet. Ol úshin sportshylarymyzdy búkil el, ult bolyp qoldaýymyz kerek. Sport – birlikti nyǵaıtatyn keremet kúshke ıe. Endeshe, birligimiz ben tutastyǵymyzdy shyńdaıtyn sát týyp otyr. «Astananyń» jeńisine jankúıer bolsaq, elimizdiń sporttaǵy jetistikterine tileýles bolǵanymyz. Sondyqtan, barsha qazaqstandyqtarǵa aıtarymyz: bir sátke kúıbeń tirlikti umytyp, óz komandamyzdyń jeńisine tileýlestik tanytaıyq! Eń bastysy, osy oıyndy kórip otyryp, ózimizdiń ulttyq rýhymyzdy, kúsh-qaıratymyzdy asqaqtataıyq! Ár otbasynda ultqa, elge degen súıispenshilik, patrıotızm sezimi ulǵaısyn! Sol arqyly Otanymyzdyń ár jetistigine qýanaıyq! Sol kezde eldigimiz máńgilik, tutastyǵymyz tuǵyrly, urpaǵymyz ǵumyrly bolady. Olaı bolsa, búgingi túnde barsha otandastarymyz «Astananyń» rýhy asqaqtap, Eýropanyń tórinde kók baıraǵymyzdyń jelbiregenin kórýge jazsyn!
Alǵa, «Astana»! Alǵa, Qazaqstan!
Ámirlan Álimjan
