Bıylǵy jyly bilim granttaryn taǵaıyndaý konkýrsyna 59 677 túlek qatysyp jatyr. Olardyń ishinde 47 342 adam, ıaǵnı 80 paıyzǵa jýyǵy qazaq, al 12 335 adam orys tilinde oqyǵan. Bul týraly búgin bilim granttaryn bólý jónindegi respýblıkalyq konkýrstyq komısıanyń otyrysynda QR Bilim jáne ǵylym mınıstri Erlan Saǵadıev málim etti, - dep habarlaıdy Qamshy.kz BNews.kz - ke silteme jasap.
Jalpy, bıyl 31 702 grant bólingen. Onyń ishinde 2 950 oryn joǵary oqý oryndarynyń daıyndyq bólimshelerine, 28 752 grant kúndizgi bólimge qarastyrylǵan.
«Bıyl memlekettik tapsyrysty qalyptastyrý eldiń áleýmettik-ekonomıkalyq damýynyń strategıalyq basymdyqtaryna negizdeldi. 12 593 grant tehnıkalyq jáne tehnologıalyq, 5 myńǵa jýyq grant pedagogıkalyq, 2 690 grant aýyl sharýashylyǵy jáne veterınarlyq, 3 myń grant medısınalyq mamandyqtarǵa bólindi. Bilim granttaryn ornalastyrý múmkindigine bıyl 87 joǵary oqý orny ıe boldy. Byltyr olardyń sany 64 bolatyn. Bul oqý oryndarynyń tizimi konkýrstyq negizde anyqtaldy», - dep habarlady E.Saǵadıev.
Bıyl elimizde ulttyq biryńǵaı testileýge 84 041 oqýshy qatysyp, 69 789 adam synaqty sátti tapsyrǵan. Ortasha bal - 81,2. Al 74 881 adam keshendi testileýden ótip, olardyń 27 743-i shekti bal jınady. Ortasha bal – 39,9.
«Osylaısha, ulttyq biryńǵaı testileý men keshendi testileý qorytyndysy boıynsha 97 532 adam joǵary oqý oryndaryna túsý quqyǵyna ıe boldy. Bilim granttaryn taǵaıyndaý konkýrsyna 59 677 adam qatysyp jatyr. Onyń ishinde 47 342 adam, ıaǵnı 80 paıyzǵa jýyǵy qazaq tilinde, 12 335 adam orys tilinde oqyǵan», - dep atap ótti mınıstr.
Esterińizge sala keteıik, Erlan Saǵadıev mınıstr bolyp taǵaıyndalǵannan keıin jasaǵan alǵashqy málimdemesinde memlekettik til men osy tilde bilim alý júıesine qatysty oıyn aıta kelip, qazaq tilinde bilim alǵan jastardyń bolashaǵyna kúmán keltirgen bolatyn.
«Qazaq mektepterinde oqyǵan jastardyń ári qaraı sapaly bilim alýynyń shekteýli ekenin kórip otyrmyz. Mysaly, bizdiń eń joǵary aǵylshyn tilinde dáris beretin Nazarbaev Ýnıversıtetine, QMEBI, QBTÝ, IT ýnıversıtetterine aýyl jastarynyń túsýine biraz qıynshylyqtardyń bar ekenin ózim kórdim... Bizde orys tilinde oqytatyn mektepter de bar. Olarda da kóptegen qazaq jastary oqıdy. Shynyn aıtsaq, osy jastardyń kóbi, tipten qazaq jastarynyń kóbi qazaq tilin durys bilmeıdi, durys túsinbeıdi. Osyndaı sebepterge baılanysty bizdegi bilim alý júıesinde tepe-teńdik joq, jastardyń bári bir deńgeıde sapaly bilim alýyna jaǵdaı jasalmaǵan. Bizdiń maqsatymyz – osyndaı qaıshylyqtardy joıyp, jastarǵa, ásirese aýylda júrgen jastarǵa, bárine birdeı sapaly, zaman talabyna saı bilim berý», - degen edi E.Saǵadıev.
