Búgin Almatyda Ulttyq bank tóraǵasynyń qatysýymen ótken kezdesýde bul másele taǵy qylań berdi. Jınaqtalǵan aqshasyn salymshyǵa baspana alý úshin, emdelý úshin nemese bilim alý úshin nege bermeske dep usynys tastaǵan bas bankır, bul oıynan aınyp qalǵandaı, - dep habarlaıdy Qamshy.kz 31-arnaǵa silteme jasap.
Zeınetke shyqpaı turyp, ulttyq biryńǵaı zeınetaqy qoryndaǵy qarajatty ýaqytsha qoldaný múmkindigi jaldamaly páter bosaǵasynan syǵalap júrgen otbasyǵa baspana alýǵa, granttan qaǵylǵan talapkerge nesıege júginbeı joǵarǵy oqý ornyna túsýge mursat berer edi. Alaıda bul suraqty jan-jaqty talqylap jatyrmyz degen Ulttyq bank tóraǵasy, alǵan betinen qaıtyp qalǵan sıaqty. Sebebi búgin ol memlekettiń bastapqy maqsaty turǵyndarymyzdy qartaıǵan shaǵynda muqtajsyz kárilikpen qamtamasyz etý.
DANIAR AQYSHEV, Ulttyq bank tóraǵasy:
- Birinshi kezekte bul qartaıǵan shaǵyn qamtamasyz ete alatyn, jınaǵy jetkilikti deńgeıdegi adamdarǵa qatysty. Iaǵnı bul suraqty salymshynyń jınaǵy qajetti kólemnen artyp jatqanda ǵana qarastyrýǵa bolady. Jınaqtaýshy zeınetaqy júıesine turaqtylyq qamtamasyz etý de mańyzdy másele. Adamdar bul múmkindikti qoldanamyz dep, zeınetke shyqqanda taqyrǵa otyryp qalmaýy qajet.
Dese de Danıar Aqyshev zeınetkerlik demalysqa shyqpaı turyp, zeınetaqy qorynda jınaqtalǵan aqshany alýdyń ózge jolyn usyndy. Onyń aıtýynsha, árkimniń qordaǵy qarajatty saqtandyrý kompanıasyna aýdaryp, zeınetaqy anýıteti týraly kelisim shart qurýǵa quqyǵy bar. Ony áıelder 50 jastan, al erler 55 jastan bastap rásimdeı alady. Alaıda bul úshin jınaqtaǵan aqshańyz belgili bir somadan asýy kerek.
VLADIMIR AKENTEV, saqtandyrý kompanıasy tóraǵasynyń orynbasary:
- Siz zeınetke erte shyǵýǵa quqylysyz, alaıda ol úshin jınaǵyńyz erler 6 mıllıon, al áıelder 8 mıllıon teńgege jýyq aqsha jınaýy kerek. Tek osy jaǵdaıda ǵana saqtandyrý kompanıasy sizben kelisim shartqa otyrady. Sondaı-aq biryńǵaı jınaqtaýshy zeınetaqy qoryndaǵy qarajat muraǵa qaldyrylsa, saqtandyrý kompanıasynda mundaı shart joq. Eger adam zeınetaqy anýıteti týraly kelisim shart jasap, 1 jyldan keıin dúnıeden ozyp ketse, qarajaty jaqyndaryna berilmeıdi.
Jalpy byltyrǵy jyly saqtandyrý uıymdaryna 6 myńnan astam salymshy óz jınaǵyn aýdarǵan eken. Al jyl basynan beri anýıtet satyp alýshylar kólemi 1300 adamǵa jýyqtaǵan. Iaǵnı, osynsha adam merziminen erte zeınetin kóre bastady. Alaıda bul tendensıa jalǵasyn tapsa jınaqtaýshy zeınetaqy júıesine tıimsiz. Al, Ulttyq bank tóraǵasy ótken aptada kúrt kóterilgen dollarǵa qatysty jaýapty qysqa qaıyrdy. Munaı basty faktor, degenmen ózge de kýrsqa yqpaldy sebepterdi eskersek, munaı arzandaǵan saıyn teńge de qunsyzdana beredi deýge bolmaıdy dedi ol.
