Almatyda avtobýstyń apatqa ushyraýyna basqa bir kólik sebep bolǵan kórinedi. 13 jolaýshyny aýrýhanadan bir-aq shyǵarǵan avtobýs júrgizýshisi búgin óziniń kinásiz ekenin aıtty. Ákimjan Shámıevtiń aıtýynsha, qoǵamdyq kólikti jol boıy jaǵalasqan júrgizýshilerdiń biri qysyp jiberipti. Jolaýshyǵa lyq toly avtobýs keshe keshke Raıymbek jáne Súıinbaı dańǵyldarynyń qıylysynda beton qabyrǵaǵa soǵylǵan bolatyn. Jolaýshylardyń arasynda aıy-kúni jaqyndaǵan júkti áıel de bolǵan, - dep habarlaıdy Qamshy.kz KTK arnasyna silteme jasap.
Avtobýstan aýzy-murny qanap shyqqan jolaýshylar ishte qalǵandarǵa dereý kómek shaqyrtyp jatyr. Bul kadrlardy oqıǵa kýágerleri túsirip alǵan. Jalpy, qabyrǵaǵa ońbaı soǵylǵan qoǵamdyq kólikti qyzyq kórip turǵandar jeterlik. Tek onyń ishinde júkti áıel men taǵy 12 jolaýshy qınalyp jatyr-aý degen eshkimniń oıyna kirip-shyqpaıtyn sıaqty. Soqqynyń qatty bolǵany sonshalyq, avtobýs júrgizýshisi bashpaılarynan aıyrylǵan. Ampýtasıadan soń esin jıǵan Ákimjan Shámıev ózin kinálimin dep otyrǵan joq.
Ákimjan Shámıev, avtobýs júrgizýshisi:
-Jarysqanym joq. Kópirden túsip bara jattym. Áriptesime avtobýsty bergeli jatqanmyn. Keıin byt-shyty shyqty báriniń.
28 jastaǵy jigit jol ústinde hali nasharlaǵanyn aıtady. Sol sebepti de, avtobýsty basqa júrgizýshige tabystamaq bolǵan eken. Alaıda jol boıy jaǵalasqan kólikterdiń biri oǵan kesirin tıgizipti.
Ákimjan Shámıev, avtobýs júrgizýshisi:
- Kishkene kezimnen avtobýsta kondýktor bop istedim. Almatyda avtobýs júrgizgenime 8 jyl boldy. Joq, qudaı saqtasyn bundaı jaǵdaı bolmaǵan. Jazym ǵoı endi kimniń basyna kelmeıdi?
-Jyldamdyqty mejeden asyrmadym dep ant-sý ishken avtobýs júrgizýshisi mine dál osy burylysqa kelgen tusta ony basqa bir kóliktiń basa oza shaýyp, osynda qaraı buryp jibergenin aıtady. Biraq sol kezde basy aýyryp turǵan jigit ol kóliktiń ne túrin de, ne túsin de baıqamapty. Egerde onyń aıtyp turǵany ras bolsa, ol jaǵdaıdy mine munda ilinip turǵan beınebaqylaý kameralary túsirip alýy ábden múmkin.
Osy oqıǵa saldarynan 13 adam aýrýhanadan bir-aq shyqqan. Olardyń ekeýine ota jasaldy. Al júkti áıeldiń mıy shaıqalǵan.
Nurjan Isabekov, Almaty qalasy densaýlyq saqtaý basqarmasynyń bas hırýrgi:
-Ol naýqasqa túsken kezde arnaıy zerttteý júrgizildi ish qýysyna, balaǵa, sondyqtan eshqandaı qaýip-qater bolmaǵandyqtan, naýqas qazirgi tańda neırohırýrgıa bóiliminde jatyr. Arnaıy em alyp jatyr.
Zardap shekkenderdiń arasynda 14 jastaǵy bala men 74 jastaǵy qarıa da bar. Zeınetkerdiń aıaq-qoly synǵan. Qazir jol apatyna qatysty qylmystyq is qozǵaldy.
