AQSH ıslam ǵulamasy Fethýllah Gúlendi Túrkıaǵa bermeýi múmkin. Óıtkeni, túrik bıliginiń ony ekstradısıalaý úshin usynǵan dálelderi jetkiliksiz kórinedi , - dep habarlaıdy Qamshy.kz RIA Novostı – ǵa silteme jasap.

Derekkózderdiń habarlaýynsha Túrkıa men AQSH-tyń resmı ókilderi F. Gúlendi ekstradısıalaýdyń túrli senarılerin talqylaǵan. Alaıda, Ankara amerıkandyq sheneýnikterdi aıtqandaryna kóndire almaǵan.

Sondyqtan, bul másele jóninde aqyrǵy sheshim áli qabyldanbaǵany, al, kelissózderdiń birneshe aıǵa deıin sozylyp ketýi múmkin ekendigi aıtylýda.

Birqatar basylymdar Túrkıa tarapynan Gúlendi qaıtarýǵa baılanysty resmı talap qoıylmaǵanyn, AQSH qorǵanys basshylarynyń Túrkıaǵa sapary barysynda da tóńkeriske AQSH-tyń qatysy týraly eshteńe aıtylmaǵanyn jazýda. 

Buǵan deıin Túrkıanyń Ádilet mınıstri Bekir Bozdaq F. Gúlenniń AQSH-tan qashyp ketýi múmkin ekenin málimdegen bolatyn. Al, Gúlenniń ózi bolsa, Túrkıada bolǵan tóńkeris jasaý áreketine esh qatysy joqtyǵyn aıtyp, málimdeme jasaǵan.