Túrik Respýblıkasynyń prezıdenti Rejep Taııp Erdoǵan bizdiń Memleket basshysy Nursultan Nazarbaevqa Ankara men Máskeý arasyndaǵy ózara qatynasty qalpyna keltirý isinde qosqan úlesi úshin alǵys bildirdi, - dep habarlaıdy Qamshy.kz QazAqparatqa silteme jasap. 

 «Shyndyǵynda, Reseımen araqatynasymyzdaǵy shıelenis kezeńinde Nursultan Nazarbaev birneshe ret Pýtınmen kezdesip, kelissózder júrgizdi, bizdiń qatynastardy  qalpyna keltirý isinde úlken qoldaý kórsetti. Ózbekstandaǵy SHYU sońǵy samıtinde ol arnaıy elshi jiberýimdi surady, men jiberdim», - dedi Erdoǵan ekijaqty kelissózder qorytyndysy boıynsha baspasóz konferensıasynda.

Túrik memleketiniń basshysy elshi arqyly V. Pýtınge jibergen hattan keıin bul másele oń baǵytqa ózgerdi.

«Men muny Reseımen ózara qarym-qatynasymyzdaǵy betburys dep sanaımyn. Sondyqtan bul máseleni sheshýde Nursultan Nazarbaevtyń róli erekshe.  Ózderińiz bilesizder, sársenbide Sankt-Peterbýrgte Pýtın myrzamen kezdesemin. Bizdiń delegasıa kezdesedi», - dep atap ótti Erdoǵan.

Túrik Respýblıkasynyń prezıdenti Reseımen ózara qarym-qatynastaǵy aýyr daǵdarysty ýaqyttar  artta qalyp, burynǵy qatynas qalpyna keletinine  senim bildirdi.

 «Biz Nazarbaevtyń eńbegin esh ýaqytta umytpaımyz. Taǵy da óz atymnan, túrik halqynyń atynan Túrkıa men Reseı  arasyndaǵy ózara qatynasty  qalpyna keltirý isinde zor yqpaly úshin alǵys bildiremin», - dedi Erdoǵan.