Balbaltastan syr izdegen, ata tarıhymyzdyń qatparlaryna úńilip, "Qasqyr Qudaı bolǵan kezden" bergi zamanǵa deıingi aralyqty zerdelep, Shyńǵysqan shyndyǵyn qaýzaǵan qaıran qaısar aqyn Ámirhan Balybek 45-ke qaraǵan  shaǵynda dúnıeden ozdy.

Ámirhan Balqybek 1969 jyly 19 mamyrda Jetisaı aýdanyna qarasty Lenın atyndaǵy ujymsharda týǵan. 1986 jyly Shardara kalasyndaǵy M. Áýezov atyndaǵy orta mektepti bitirip, 1987-89 jyldary áskerde boldy. Áskerden oralǵan soń Shardara aýdandyq "Ósken óńir" gazetinde tilshi boldy. 1990 jyly ál-Farabı atyndaǵy Qazaqtyń memlekettik ulttyq ýnıversıtetine oqýǵa túsedi. 1995-2000 jyldary respýblıkalyq "Parasat", "Jas alash", "Ana tili" basylymdarynda qyzmet atqardy. Ámirhan Balqybek Kazaqstan Jazýshylar odaǵynyń múshesi. Ádebıet salasy boıynsha eki ret (1997, 1998) Prezıdent stıpendıasyn ıemdengen. Sonymen qatar, "Metamarfoza"(1996), "Synǵan sáýleniń shaǵylysýy" (2001) atty jyr kitaptarynyń avtory.

Ámirhan Balqybektiń otty jyrlary men jarqyn beınesi qazaq jurtynyń esinde máńgi qalmaq. Aqynnyń otbasyna jáne oqyrman qaýymyna kóńil aıtamyz! Jatqan jeri jaıly, topyraǵy torqa bolǵaı!

Arman  Áýbákir, jýrnalıs: - Qaıran, Ámirhan aǵam! Týra Ulystyń uly kúninde Almatydaǵy alańnan kórip edim ózińizdi. Baıaǵy jaıdary jymıys, baıaǵy qaǵytpa qaljyn... Sol kezde sizben sońǵy ret júzdesip turǵanymdy bilsemshi... 2010 jyly shamasynda Qazaq ulttyq ýnıversıtetiniń shaǵyn jataqhanasynda ózińizben kezdesý ótkizgenimiz áli esimde. Túpsiz tarıhtan tolǵap, ádebıet álemine tereń boılap, arqyraǵan sarqyramadaı jyrdan shashý shashyp edińiz. Endi sizdiń ekinshi ómirińiz bastaldy. Kúki tirshilikten táýelsiz ómir! Aspanǵa asqaq rýhyńyz asaý jyrlaryńyzben syrly sýret salǵan shyǵar... Ony oqıtyn bizde "kóz" qaıda? Sizdi kóp kisi jas dedi, biraq, bas bolýǵa laıyq edińiz. Qadirińizge jete almaǵanymyz úshin keshirińiz bizdi!.. endi ókin ne, ókinbe ne? Baqul bol, aǵa!

Erlan Júnis, aqyn: Kez-kelgen jas adamǵa, jas qalamgerge: "Bahadyrim-eı", "Jeti bir de bozdaǵym", "Sen Genıısiń-eı" deıtin qaıran Kókem-aı, qaıran Qaskyr Kókem-aı, qosh bolyńyz!

Tanagóz İlıasova: - Ólim sonshalyqty jaqyn... Keshe úıimniń qasyndaǵy kósheni qurylysshylar tereń etip qazyp tastapty. Shirkin, osynyń astynda ólip jatsa ǵoı degen bir oı keldi. Ólimniń keremet súıkimdi bolyp kóringeni osy shyǵar. Ólgen adamdar qandaı baqytty, biz nege odan sonsha úreılenemiz dedi ekinshi oıym. Bilmeımin, búgin mynadaı sýyq habar aldyq. Bári bir-birden ketip jatyr. Esenqul, Farıza, Ámirhan... Bizge kezek qashan keledi eken?

Aıdos  Sarym: saıasattanýshy: - Joldasymyz, aqıyq aqyn, talantty pýblısıs Ámirhan Balqybekten aırylyp qaldyq.... Sońǵy habarlasqanda "Eı, Aıdos-eı! Bárin oqısyń ǵoı, maǵan Mo Iannyń romanyn taýyp bershi. Asyqpaı oqıyn" dep ótinish aıtyp edi. Kitap dúkenine baryp, satyp alyp, jigitterden berip jiberip edim. Jarq-jarq etip, gúr-gúr etip redaksıaǵa kelip, kóńildi bir kóterýshi edi. Bir ǵana "Morskaıa pehotasy" qandaı edi... Kim oılaǵan?? Tóbeden jaı túskendeı bolyp otyrmyn... Allaǵa da aqjarqyn adamdar qajet shyǵar... Qosh bol, Ábes! Imanyń joldas bolsyn....