Arabtarǵa turmysqa shyqqan qazaqstandyq úsh qyz bastan ótkergen oqıǵalaryn NewTimes.kz basylymynyń tilshilerine aıtyp berdi.
Olardyń biri - Taldyqorǵannyń 29 jastaǵy turǵyny Darına. Ol Birikken Arab Ámirlikterine 400 myń teńgeden joǵary jalaqy úshin barypty. Sol jaqta ol orta jastaǵy baıqýatty arabpen tanysady. Sóıtip, er adam bir aı ótkende oǵan turmysqa shyǵý týraly usynys aıtqan. Osylaısha tirshiliktiń qamyn umytyp, qolastynda qyzmetshisi bar záýlim úıde kúıeýinen áshekeı buıymdar men ystyq mahabbattyń raqatyn kórý týraly múmkindik paıda bolady. Al eń bastysy - oǵan bala bosanyp berý, ul bala.
"Meniń kúıeýim baıqýatty adam, saǵattap jalaqy alady. Úshinshi áıelge bar múmkindigi jetedi, alaıda qazir ol bizge tipti ınternettiń tólemin de bermeıdi. Nekeleskenimizge birneshe jyl boldy, úsh balamyz bar, eń jamany, eshqaısysy ákesine uqsamaǵan, barlyǵy ashyq reńdi. Qyzdarymdy tipti adam eken demeıdi, jaqtyrmaıdy. Balalarym bolsa mektepke de barmaıdy, oqýyna ákesi bola tura aqsha bergisi de joq. Aqshasy joq emes, turmysymyzdy ápsátte kóterip tastaıtyn jaǵdaıy bar, mektep pen Internettiń aqysyn tóleýge, kóshede erkin serýendeýime jaǵdaı jasaı alady. Biraq qalamaıdy", - deıdi Darına.
Al Shymkenttiń 27 jastaǵy týmasy, alaıda qazir Dýbaıda turatyn Marjan oqıǵasyn bylaı baıandaıdy: "Ámirlikterde sheteldikter tek ekinshi áıel bola alady, jurty sharıǵat zańy boıynsha arab qyzdarynyń birinshi áıel bolýyn qup kóredi. Kúıeýim baı adam, birinshi áıeli bar. Dýbaıdaǵy ómirimdi bulaı elestetpeppin. Bastapqyda barlyǵy jaqsy bolatyn, bala bosanyp bergennen keıin ózgerip shyǵa keledi. Kúıeýimniń ruqsatynsyz eshqaıda da shyǵa almaımyn. Óz erkim joq, ol qalaǵan kıimdi kıemin. Ol talap etken asty ǵana ishemin. Úı janýary sekildimin. Arabtardyń áıelderinde eshqandaı da quqyq joq. Jumys isteýge tyıym saldy. Bar sharýam - úıde otyrý, eshqaıda shyqpaı, kútý ǵana. Jumysynda bir máseleler shyǵyp qalsa da, basqa qıyndyqtary týsa da, men kináli bolyp shyǵa kelemin. Sońǵy kezderden beri qol kótere bastasa kameraǵa túsirip alýǵa ádettendim. Polısıa shaqyrǵannan keıin ǵana sabasyna túsedi. Biraq balalarymdy jaqsy kóredi. Kóńilge medet bolatyny osy ǵana, osy úshin ǵana ómir súremin".
Onyń aıtýynsha, Ámirlikterge Qazaqstannan barǵan qyzdar óte kóp eken. Áıelder ózara baılanysyp, bir-birine qoldaý bildirip júredi eken. Tájirıbe almasyp, keńester aıtady.
Basylymǵa suhbat bergen úshinshi qyz - Qostanaıdyń 31 jastaǵy týmasy - ajyrasyp ketse de, Dýbaıda qalyp qoıypty. "Uryp-soǵyp, úrkitkennen keıin osyǵan bel býdym. Osylaı taǵy jalǵasqanda qyzym ekeýmiz aman qalmas edik. Baqytymyzǵa oraı, zorlyq-zombylyq kórgenimdi dáleldeı aldym, sóıtip qana ajyrastyq. Balam ul bolǵandyqtan, oǵan ońaıyraq, sebebi bul elde 70 paıyz erler, qalǵan 30 paıyzy ǵana áıelder. Balalaryma memleket baspanasyn tóleıdi, tamaqqa chek beredi, mektebin de tóleıdi, medısınalyq qyzmetin de tólep beredi. Men Qazaqstan azamatshasy bolǵandyǵymnan, em alýǵa qyzmet tegin emes, tek jeńildik alyp turamyn, sebebi arabtyń balalaryn tárbıelep otyrmyn", - deıdi aty-jónin ataǵysy kelmegen qyz.
Basylymnyń málimetinshe, bul oqıǵalardan asyp túsetin jaǵdaılar bar. Áıelder múgedek bolyp qalatyn nemese óz-ózine qol jumsaýǵa ıtermeleıtin jaǵdaılardyń bolǵanyn aıtady, sebebi, arab elderinde er adamdarǵa sot joq eken.
"Alaıda qyzdar kúıeýge shyǵý týraly raılarynan qaıta ma degen suraqqa birkelki jaýap qatpaıdy. Soǵan qaraǵanda, balalary úshin jáne baıqýatty ómir úshin qazaqstandyqtar osyndaı qatygezdikterge tózýge de daıyn. Ámirlikterdiń bıligi arab balalarynyń analaryn ash-jalańash, úısiz-kúısiz qaldyrmaıdy, deıdi qyzdar. Mundaı ómir úshin olar bostandyqtaryn da qıýǵa daıyn", - dep jazady maqala avtory.
