Keshe Ońtústik Qazaqstan oblys ákiminiń orynbasary J.Bókenbaevtyń tóraǵalyǵymen jer qoınaýyn paıdalaný salasyndaǵy kúrdelengen máselelerdi talqylaý jóninde dóńgelek ústel ótti, dep habarlady OQO ákiminiń baspasóz qyzmetinen.
Oblystyq tabıǵı resýrstar jáne tabıǵat paıdalanýdy retteý basqaramasynyń uıymdastyrýymen ótken jıynda salaǵa jaýapty memlekettik organdardyń qyzmetkeleri men jer qoınaýyn paıdalanýshylar jalpy sany 150-ge jýyq adam qatysty.
Májiliste oblystyq tabıǵı resýrstar jáne tabıǵat paıdalanýdy retteý basqarmasynyń basshysy M.Otarshıev jalpy oblystaǵy jer qoınaýyn paıdalaný salasyndaǵy búgingi aqýaldy baıandap, birqatar atqarylyp jatqan jumystarǵa toqtaldy.
Keıinnen, oblystyq mamandandyrylǵan tabıǵat qorǵaý prokýrory, jer qatynastary basqarmasynyń basshysy baıandama jasap, jer qoınaýyn paıdalanýshylar tarapynan jıi oryn alatyn zań buzýshylyqtar, kelisimshart aýmaqtaryn ózenderdiń sý qorǵaý beldeýinen shyǵarý jáne jer qoınaýyn paıdalaný maqsattary úshin jerlerdiń resimdelýi jóninde málimet usyndy.
Sondaı-aq, otyrysta jer qoınaýyn paıdalaný salasynda kúrdelengen máseleler jaıy aıtylyp, eki taraptyń da pikirleri men usynystary eskerildi.
Sonymen qatar, jer qoınaýyn paıdalanýshylarǵa oblystyq tabıǵı resýrstar jáne tabıǵat paıdalanýdy retteý basqarmasy men oblystyq mamandandyrylǵan tabıǵat qorǵaý prokýratýrasymen birlesip ázirlengen «Jer qoınaýyn paıdalanýshylar jadnamasy» taratylyp úlestirildi. Jadnamada jer qoınaýyn paıdalanýshyda qandaı ruqsat qujattar bolýy qajettigi, mindettemeleri men jaýapkershilikteri kórsetilgen.
