Ońtústik Qazaqstan oblysynyń dıqandary jyl on eki aı Pavlodarǵa kókónis jetkizip turatyn boldy, - dep habarlaıdy Qamshy.kz 24.kz - ke silteme jasap.

Esesine ol jaqtan jylyjaıǵa qajetti Ekibastuzdyń kómiri men elektr energıasy tasymaldanady. Bul týraly eki oblys basshysynyń kezdesýi barysynda aıtyldy. Óńiraralyq yntymaqtastyqty nyǵaıtýdy kózdegen delegasıa quramynda 20-dan astam aýylsharýashylyq jáne iri taýar óndirýshi kásiporyn basshylary bar. Pavlodar jerasty qazba baılyǵymen erekshelense, maqta tek ońtústikte ǵana ósedi. Bul óńirdegi toqyma klasteriniń damýyna sep bolýda. Óndiriske qajetti transformator men munaı-hımıa salasynda qoldanylyp júrgen jerasty sorǵylary da ońtústikte jasalady. Delegasıa músheleri Shymkenttegi ındýstrıaldy jáne «Ońtústik» arnaıy ekonomıkalyq aımaǵyndaǵy birqatar kásiporyndy aralady. Bıznes ókilderi bir-birimen pikir almasyp, saýda-sattyqty júıeleýge ýaǵdalasty. Sapar aıasynda ónerkásip, aýyl sharýashylyǵy jáne áleýmettik-ekonmıkalyq salalarynda yntymaqtasý týraly memorandýmǵa qol qoıyldy.

Nurlan Erejepov, kásipker (Pavlodar):
- Biz zalalsyzdandyrý quraldaryn óndiremiz. OQO-nyń barlyq aýdandary, sonyń ishinde Shymkent, Arys, Kentaý, Túrkistan jáne Saryaǵash qalalary men búkil aýdandar bizdiń ónimdi qoldanady. Bul kezdesý óńiraralyq ıntegrasıa prosesine jańa serpin beredi dep senemin.

Saparbek Tuıaqbaev, oblys ákiminiń orynbasary:
- Maqsat eki óńir arasyndaǵy taýar aınalymdy jáne otandyq ónimdi qoldaý baǵdarlamasy aıasyndaǵy qoldaýlar kórsetý. Árıne kóp óńirlerde tipti kórshi óńirlerde óndirip jatqan taýarlardy kásipkerler bile bermeıdi. Osy is-sharalardyń arqasynda sonyń bári tanystyraltyn bolady. Osy is-shara kásipkerlerdiń qol jetkize almaı júrgen túrli kedergilerine sheshim bolyp tabylady.