Almaty oblysynda bútindeı bir aýyl Sibir jarasy kómilgen jerdiń dál irgesinde otyr. Mundaǵy 50 shaqty shańyraqqa kezinde jergilikti bılik qujattaryn túgel zańdastyryp bergen eken. Biraq qaýipti keseldiń kómilgeni týraly eshkimge aıtylmapty. Jurt ábden ornyǵyp alǵan kezde ol jerdiń asa qaýipti ekeni anyqtalǵan. Endi jergilikti ákimdik turǵyndarǵa bul mańaıdan kóshý kerektigin aıtyp otyr. Al aýyldyqtardyń basqa barar jer, basar taýy joq, - dep habarlaıdy Qamshy.kz KTK arnasyna silteme jasap.
Báıdibek bı aýyly turǵyndarynyń sońǵy kúnderi tynyshy qashqan. Óıtkeni, «Sibir jarasy» kómilgen jerdiń kesirinen jergilikti ákimdik endi ornyǵa bastaǵan aýyldyqtarǵa kóshý týraly áńgime qozǵapty. Qaýipti aýmaq ekenin eskertetin myna taqta men qorshaý 2012 jyly ornatylǵan eken. Biraq ákimdik ókilderi arada tórt jyl ótkende baryp turǵyndardy kóshirý týraly oılana qalypty.
Nurgeldi Qoja, Báıdibek bı aýylynyń turǵyny:
-Ókimet úı salýǵa bolady dep, tıisti qujattarymen jasap bergen. Bárimiz úıdi saldyq. Endi bıyl kep, myna jerde «Sibir jarasy» degen aýrý bar, bul jerge otyrýǵa bolmaıdy, sender kóshesińder deıdi.
Biraq sońǵy tıynyn sanap júrip úı turǵyzǵan kisilerdiń bul jerden ketkisi joq.
Dúısen Sháken, Báıdibek bı aýylynyń turǵyny:
-Sonsha aqshamyzdy saryp qyp, ishpeı-jemeı, bala-shaǵamyzdyń kıimin de kıgizbeı osy úılerdi áreń salyp bolǵanbyz. Endi bizdiń barar jerimiz, basar taýymyz joq. Eshqaıda barmaımyz, osy jerde otyramyz.
Qaýipti aýmaq týraly eskertý taqtasy Bekbolattyń úıiniń dál irgesinde tur. Tańerteń uıqydan oıanǵan saıyn terezeden jasyl dala emes, qorqynyshty jazýy bar myna taqta shyǵa keledi. Sodan beri bala-shaǵasyn dalada oınatýdan qorqatyn bolǵan.
-Jergilikti ákimdiktiń asa qaýipti dep tanyǵan aýmaǵyn qazirgi tańda mynadaı qur qańyltyr ǵana qalqalap tur. Aragidik bolatyn daýyldan onyń keıbir jeri tipti qırap jatyr. Degenmen, turǵyndar úshin eń qorqynyshtysy bul qorshalǵan aýmaq emes. Sonyń ishinde kózge túrpideı tıetin «Sibir jarasy» degen jazý ǵana.
Mundaǵy 53 jer telimi adamdarǵa 2007-2008 jyldary berilipti. Biraq ol kezde aty óshkir aýrý týraly eshkim bilmegen eken. Al 4-5 jyldan keıin muraǵat aqtarylyp, ol jerde sibir jarasymen aýyrǵan mal kómilgeni anyqtalǵan. Alaıda aýyl ákimi eshkimdi kúshtep kóshirmeımiz dep ant-sý iship otyr.
Erjan Ámirdenov, Báıdibek bı aýyldyq aımaǵynyń ákimi:
- Daıyndap alǵannan keıin sondaı usynys jasaımyz. Al kóshe me, kóshpeı me, sol jerde tura ma, ony ózi biledi, ár adamnyń. Eshkimdi ol jerden kúshtep kóshireıin dep jatqan joqpyz.
Tıisti mekemeler de aýyz sý men topyraq-shóbine deıin synamalar júrgizip, qorshalǵan aýmaqtyń mańaıyndaǵy elge esh zıany joq degen qorytyndy jasapty. Tek qańyltyr qorshaý álsiz bolǵandyqtan, qyrkúıektiń sońyna deıin jańadan myqty materıaldarmen qaıta qorshalatyn bolypty.
