Serebránsk qalashyǵynda ornalasqan jıektas shyǵarýshy zaýyt qazirgi kúnde sapaly ónimderimen aımaqqa tanylyp keledi. «Bıznestiń jol kartasy – 2020» baǵdarlamasy aıasynda birer jyl buryn ashylǵan kásiporynda ırandyq zamanaýı tehnıkalarmen jabdyqtalǵan.

Búginge deıin jobany tolyqtaı jetildirý úshin 9 mln teńge qarajat jumsalǵan. Jańa óndiris oshaǵy jıektas jáne taqtaıshalardyń jıyrmadan astam túrin shyǵaryp keledi. Al ırandyq rezınalyq qalyptarǵa quıylǵan taqtaıshalardy óńdeý ońaı jáne sapasy joǵary bolyp shyǵady.

–  2014 jyly kásibimizdi bastasaq ta, ár jyl saıyn jańashyldyq engizip, jańa serpinmen kirisip kelemiz. Qazirdiń ózinde Serebránovsk qalasyn tolyqtaı jıektastarmen qamtamasyz etip otyrmyz. Al ortalyq alańdy túrli bederli taqtaıshamen qorshap shyǵý degen biz úshin kóp jumys emes. Tek tapsyrys bolsa bolǵany, kez kelgen kólemdi qysqa ýaqytta sapaly etip ázirlep beremiz, – dedi kásiporyn dırektory Saltanat Suńǵatova.

Sondaı-aq, jýyrda jıektastarmen qatar, sementten quıylǵan qorshaýlar shyǵarý da qolǵa alynǵan. Sapasy joǵary bolyp keletin jıektastar men qorshaýlardyń taǵy bir ereksheligi, baǵasy jergilikti turǵyndar úshin tıimdi.

Aıta ketsek, Zyrán aýdanynda Elbasynyń 5 ınstıtýsıonaldy reformasynyń İİİ baǵyty «Indýstrıalandyrý jáne ekonomıkalyq ósim» baǵyty boıynsha 2016-2020 jyldar aralyǵynda 6 baǵyt boıynsha ekonomıkany jetildirýshi 65 joba qurylǵan. Al jyl basynan beri aýdannyń ózinde 282 shaǵyn kásip kózi tirkelgen.