Qazaqstandyq boksshy Qaırat Eralıev Rıo-de-Janeıro qalasynda ótip jatqan Olımpıada kezinde kórermenderdi óz ónerimen tańǵaldyrdy, - dep habarlaıdy Qamshy.kz BNews.kz – ke silteme jasap.

Olımpıada oıyndarynyń 1/16 fınalynda Eralıev sharshy alańǵa 2013 jylǵy álem chempıony Djavıd Chelebıevke qarsy shyqty. 56 kelige deıin salmaqta judyryqtasatyn jerlesimiz bul jekpe-jekte 2:1 esebimen jeńiske jetti. Qaırat Eralıev 1/8 fınaldaǵy kezdesýin Astana ýaqytymen 15 tamyz kúni saǵat 2:30-da ótkizedi.  

Aıta keterligi, jankúıerler qazaqstandyq boksshynyń sońǵy raýndta kórsetken ónerine tánti boldy. Eralıev qorǵaný kezinde sheber taktıka qoldana bildi. Qarsylasy qansha soqqy jasasa da, daryta almady. Jurt Q.Eralıevtiń qorǵanysyn Mohhamed Álıdiń stılimen salystyrdy.

1977 jyly aty ańyzǵa aınalǵan boksshy Muhamed Álı Maıkl Doýkske qarsy ótkizgen jekpe-jeginde dál osylaı sheberlik tanytqan bolatyn. Álı 10 sekýndtyń ishinde 21 soqqydan jaltaryp ketti.