Nurjan Tólendıev – moıyndalǵan talant. Bútin halyqty moıyndatyp, sahnadan oıyp oryn ala bilý kóp ónerpazǵa buıyra bermeıtin baq. Halyqtyń syny qaı kezde de qatal. Halyqty jaı, bolmashy jyltyraqpen aldaý múmkin emes.
Nurjan Tólendıev – qazaqtyń qazirgi zamanǵy satıra ónerine, komedıa janryna silkinis ákelip, qazaqy qaljyńǵa ádemi lep berip jasqa da, jasamysqa da tanymal bolǵan jan.
Boıyna bitken erekshe ártistik qabileti, sheshendigi, baıqampazdyǵy, qarapaıymdylyǵy, eńbekqorlyǵy jınaqtala, shyńdala kele halyqtyń ulyna aınaldy.
Zaman ózgerisi adamnyń kásibine de ózgeris ákeledi. Ras, ánshi, ártis, bıshi, tilshi, aqyndardyń kóbisin toıda kezdestiretin bolǵanymyz da ras. Bul bir jaǵynan halyqtyń qalaýy. Ózderi qurmetteıtin óner adamdarymen etene jaqyn bolǵysy keletin qazaqy minez de osyny qajet etedi. Tipti toılaryna sheteldikterdi de myńdaǵan, mıllıondaǵan dollarmen shaqyratyndar da bar ǵoı. Ol endi basqa taqyryp.
Óz taqyrybymyzǵa oralsaq, 15.08.2016 kúngi «Zamana» gazetine G.Halyqqyzy degen avtordyń «Toıǵa jaldaǵan asabańyz alǵan aqshasyn aqtady ma?» degen taqyryptaǵy maqalasy jaryq kórdi. Nurjan Tólendıevtiń jeke basyna tıisýge arnalǵan tapsyrysty maqala onyń qol jetkizgen jetistikterin, halyq aldyndaǵy abyroıyn kóre almaıtyn baqyrashtardyń tarapynan jasalǵan kezekti jol tosý áreketi degennen basqa aıtarymyz joq. Nurjannyń atyn qaralaý arqyly ózderiniń atyn shyǵarǵysy kelgenderdiń de peıili anyq kórinip tur.
Aqyn Muhtar Shahanovtyń osy turǵyda:
...Atyńdy, dańqyńdy shyǵarǵyń kelse osy zamanda,
Jerden ap, jerge sap ataqty tulǵany jamanda.
Zorlyǵyń erlikke telinip, zoraıyp baǵań da,
Bir kúnde-aq belgili bolasyń qoǵamǵa... degeni aınymaı kelip tur.
Senbi kúni «Eki juldyz» saltanat saraıynda úılený toı ótkizgen toı ıesi men sol toıda bastan-aıaq qatysqan kýágerdiń de sóılegen vıdeosy «Medıada N.Tólendıevke qarsy jasalǵan arandatýlardy toı ıeleri men kýágerler joqqa shyǵarýda» degen taqyrypta ǵalamtorǵa júktelipti.
(https://www.youtube.com/watch?v=4Nm75GEW9a0&feature=youtu.be), (https://www.youtube.com/watch?v=70z0iD1neUw). «Japtym jala, jaqtym kúıelerine» eldiń kózi naqty aıǵaqty kóre sala jetedi. Budan keıin endi avtor – G.Halyqqyzy men maqalany jarıalardan buryn istiń aq-qarasyn ajyratyp almaǵan gazet redaksıasy qandaı ýáj aıtar eken.
Baspasózdiń, medıanyń keıde «boıaýshy, boıaýshy dese saqalyn boıapty» degendeı, «túımedeıdi túıedeı etip, bolmaǵandy boldyǵa» jatqyzyp jiberetin tusy bar. Jel sózdi der kezinde toqtatpasa, aýa jaıyla tez tarap, ózgelerdi ılandyra túsetini de ras. Sondyqtan Nurjan Tólendıev óziniń azamattyq quqyǵyn qorǵaı otyryp, negizsiz qaralaý maqalany jarıalaǵany úshin redaksıadan jáne avtordan gazet betinde keshirim suraýdy talap etýi kerek.
Nurjan Tólendıevtiń talantynyń ólshemi men ónerpazdyq baǵasyn jalǵan pıarshylar emes, halyq áldeqashan berip qoıǵanyn keıbireýler áli de bilmeı júrgen sıaqty. Áıtpese, budan buryn da qanshama toıdy júrgizip júrgen tájirıbesi bar, óz kásibinde kemeldengen Nurjan Tólendıev dál ondaı soraqy sózderdi qoldanyp, ospadar qaljyń aıtty degenge kim senedi. Olaı bolatyn bolsa «el qulaǵy – elý» baıaǵyda-aq onyń oǵash qylyqtary týraly jarıa bolar edi.
«Jaqsynyń artynan sóz eredi» degen sóz bar halyqta. Qańqý, ósek-aıań, qaralaý, aıaqtan shalýdyń kezegi Nurjan Tólendıevke jetipti. Biraq mundaı usaqtyq, jalǵan jala onyń saǵyn syndyra almaıtynyna senimdimiz.
Aıdar Naýryzbaev
Túrkistan qalalyq sazdy-drama teatrynyń aktery, rejısery.
«M.Shoqaıdyń 120 jyldyǵy», RF-nyń «Adal Eńbegi Úshin» tósbelgileriniń ıegeri
