Búgin QR Parlamenti Májilisiniń jalpy otyrysynda «Qazaqstan Respýblıkasynyń keıbir zańnamalyq aktilerine ekstremızmge jáne terorızmge qarsy is-qımyl máseleleri boıynsha ózgerister men tolyqtyrýlar engizý týraly» zańnyń jobasy boıynsha qorytyndy ázirleý máselesi qaralyp, barlyq depýtattar ony biraýyzdan maquldady. Atalǵan mindet Halyqaralyq ister, qorǵanys jáne qaýipsizdik komıtetine júktelip otyr, - dep xabarlaıdy Qamshy.kz BNews.kz - ke silteme jasap.

Komıtet tóraǵasy Máýlen Áshimbaevtyń aıtýynsha, osy jumys aıasynda ekstremızm men terorızmge qarsy kúres, qarý-jaraq aınalymy, kóshi-qon jáne taǵy basqa máseleler boıynsha ózgerister men tolyqtyrýlar engizý kózdelgen.

«Atalǵan zań jobasyn Elbasy sesıanyń ashylý barysynda arnaıy aıtyp ótti. Zań jobasyn qabyldaýdaǵy maqsat – terorızm men ekstremızmge qarsy is-qımyl, qarý-jaraq aınalymyn jáne kóshi-qondy retteý salasyndaǵy zańnamany jetildirý. Komıtet osy zań jobasyn jumysqa alýǵa jáne qorytyndy ázirleýge daıyn», -deıdi M.Áshimbaev.

Budan bólek, komıtet «Qazaqstan Respýblıkasynyń Úkimeti men Atom energıasy jónindegi xalyqaralyq agenttik arasyndaǵy Qazaqstan Respýblıkasynda Atom energıasy jónindegi xalyqaralyq agenttiktiń tómen baıytylǵan ýran bankin qurý týraly kelisimdi ratıfıkasıalaý týraly», «Qazaqstan Respýblıkasynyń Úkimeti men Reseı Federasıasy Úkimetiniń arasyndaǵy qosarlanǵan salyq salýdy boldyrmaý jáne tabys kapıtalǵa salyq tóleýden jaltarýǵa jol bermeý týraly konvensıa aıasynda Qazaqstan Respýblıkasynyń jáne Reseı Federasıasynyń ýákiletti organdary bergen rezıdenttikti rastaıtyn resmı qujattardy taný tártibi týraly notalar almasý nysanyndaǵy kelisimdi ratıfıkasıalaý týraly», sondaı-aq «Qazaqstan Respýblıkasynyń Úkimeti men Bilim, ǵylym jáne mádenıet máseleleri jónindegi Birikken Ulttar Uıymy (IýNESKO) arasyndaǵy Qazaqstan Respýblıkasynda Ortalyq Azıa óńirlik glásıologıalyq ortalyǵyn qurý (2-sanat) týraly kelisimdi ratıfıkasıalaý týraly» zań jobalary boıynsha qorytyndy ázirleıdi.