QR Parlamenti Májilisiniń depýtaty Máýlen Áshimbaevtyń aıtýynsha, erteń «Qazaqstan Respýblıkasynyń keıbir zańnamalyq aktilerine ekstremızmge jáne terorızmge qarsy is-qımyl máseleleri boıynsha ózgerister men tolyqtyrýlar engizý týraly» zań jobasy tanystyrylady. Oǵan elimizge belgili saıasattanýshylar, quqyq qorǵaýshylar, dintanýshylar, qoǵam belsendileri men buqaralyq aqparat quraldary qatysady, - dep xabarlaıdy Qamshy.kz BNews.kz - ke silteme jasap.

M.Áshimbaevtyń sózine qaraǵanda, atalǵan qujat boıynsha ekstremızm men terorızm úshin jaýapkershilikti kúsheıtý máselesine basymdyq beriledi. Osyǵan baılanysty 20-ǵa jýyq zańǵa ózgerister men tolyqtyrýylar engizý kózdelgen. Sonyń ishinde Qylmystyq kodeks, Qylmystyq prosesýaldyq kodeks, Ákimshilik quqyq buzýshylyqtar týraly kodeks, ekstremızm men terorızmmen kúres zańnamasy jáne taǵysyn taǵy.

«Aqtóbedegi jaǵdaıdan keıin qoǵamda terrorısterdi ólim jazasyna kesý týraly usynystar aıtyla bastady. Osy másele qarala ma?», - degen suraqqa M.Áshimbaev: «Bul másele jumys tobynda jan-jaqty saralanady. Jalpy, atalǵan zań jobasynda jaýapkershilikti kúsheıtý máselesi qarastyrylatyn bolady»,-dep jaýap berdi.

Depýtattyń aıtýynsha, osy zań jobasyn qabyldaý jumysyn uzaqqa sozbaý qajet. Degenmen, asyǵys sheshimder de bolmaýy shart. Sondyqtan xalyq qalaýylary ol qujatty jan-jaqty talqylap alýdy kózdeıdi. «Negizi, bul zań jobasyn osy jyldyń aıaǵyna deıin qabyldaýymyz qajet»,-dep atap kórsetti M.Áshimbaev.

Aıta keteıik, búgin QR Parlamenti Májilisiniń jalpy otyrysynda «Qazaqstan Respýblıkasynyń keıbir zańnamalyq aktilerine ekstremızmge jáne terorızmge qarsy is-qımyl máseleleri boıynsha ózgerister men tolyqtyrýlar engizý týraly» zańnyń jobasy boıynsha qorytyndy ázirleý máselesi qaralyp, barlyq depýtattar ony biraýyzdan maquldady. Atalǵan jumys Halyqaralyq ister, qorǵanys jáne qaýipsizdik komıtetine júktelip otyr. Komıtet tóraǵasy – depýtat Máýlen Áshimbaev.