Jazýshy Dıdar Amantaı «Ádebıet» portalynda shýly suhbaty jarıalanǵan jazýshy Raqymjan Otarbaevqa jaýap berdi. D. Amantaı qazaq ádebıetiniń búgini men ótkenine qatysty jazýshynyń keı kózqarastaryn «keshirimi qıyn aýyr sózder» dep baǵalady.  

«Suqbat berýshi avtordyń ońdy-soldy siltegen aýyr shoqparynan qazaq ádebıetiniń shańyraǵy shaıqalyp ketkendeı eken. Syılaıtyn aǵam edi, nege qazaqtyń ustazy, adamzattyń danyshpany Abaıǵa til tıgizdi dep oıladym. Abaıdy álem oqyrmany óte jaqsy qabyldady. Oǵan dálel kóp.

Al «Abaı joly» – tarıh sahnasynan ketip bara jatqan, at ústinen túspegen, jalyn tartyp mingen jylqynyń qadirine jetken, kóshpeli ómirdiń sońǵy dáýirin jantalaspen bastan keshken, Batys tehnıkamen arpalysyp jatqanda, rý tartysymen álek, únemi kóship-qonǵan, jantalasa muratyna qol sozǵan nomadtardyń biri – kóshpeli qazaqtyń oı-armanyn, turmys-tirshiligin, metafızıkalyq-fılosofıalyq dúnıetanymyn, oı-sanasyn meılinshe anyq ári ǵajap beınelegen, eshqashan quny da joǵalmaıtyn, qadiri de ketpeıtin qaıtalanbas shyǵarma.

Muhtar Maǵaýın desek, kóz aldymyzǵa aıbyndy Qazaq Ordasy elesteıdi.

Ulan-baıtaq saqarada údere kóship-qonyp júrip uly Qazaq Ordasyn qurǵan alashtyń alyp handary el úshin beınet keshti. Jaýdan jaǵasy bosamady. Beıbit ómir úshin alysty. Julysty. Oıy onǵa, sanasy sanǵa bólindi. Abaı jaryqtyq aıtqandaı, aqyl altaý, oı jeteý boldy. Mamyrajaı shaq ornasa, el alańsyz sharýashylyq júrgizip, jurt qala salyp, úı turǵyzar edi. Eńbektiń jemisin, beınettiń zeınetin tatar edi. Alyptar attan túsken joq, aıaǵy úzeńgide ketti. Jaqsylyqqa izdendi. Jaryqqa umtyldy.

Handar basqarǵan sherik, qolbasshylar bastaǵan tas túıin ásker qalyń buqarany sońynan ertip, oqshaý qonyp otyrǵan árbir aýyldy shepke aınaldyryp, jan-jaqtan antalap at qoıyp shapqan, ańdyzdap jaýar bulttaı qaptaǵan jaýǵa maıdan ashyp, dushpanǵa laıyqty toıtarys berip, shapqynshylardy, basqynshylardy týǵan jerden túre qýyp otyrdy.
Sóıtip, alyptar Handyq dáýirde mekenimizdi Otanǵa aınaldyrdy. Biz Otanymyzǵa shekarasy tolyq aıqyndalǵan zamanaýı memlekettik sıpat berip, qasterli táýelsizdikke qol jetkizdik»

Handyq dáýirdiń kúrdeli obrazyn Muhtar Maǵaýın jasady. 

Asqarǵa baılanysty, tipti, qıanat aıtqan eken. Asqar – prozanyń tabıǵatyn ashty. Prozany áleýmettik taqyryptardan abstraksıalyq aqyndyq prozaǵa qaraı súıredi. Esikten – tórge...

Raqymjan aǵam keshirimi qıyn aýyr sózder aıtqan eken. Abaıdy dál bulaı aıaqasty etý jaýdyń da qolynan kelmeıtin sıaqty. Abaı – qashanda zamandas tulǵa, pikir talastyr, kelispe, kemshin tustaryn kórset, Abaı, báribir, sonysymen uly. Biraq, oǵan til tıgizý... 

Biz qashanda ataǵynan at úrketin aǵa tolqyn aqyn-jazýshylardan salıqaly, sabyrly, zıaly suqbat kútemiz. Óner-ádebıettiń bir kórinisi de sol – parasattylyq, ádildik jáne búginde el umytyp bara jatqan uıańdyq, bolmasa zıaly qarapaıymdylyq».