Rıodaǵy Paralımpıada oıyndarynda Qazaqstan quramasy alǵashqy altyn medaldi ıelendi. Júzýde aldyna jan salmaǵan Zýlfıa Ǵabıdýllına jeńiske jetti. Bul týraly Ulttyq paralımpıada komıteti habarlady. Zýlfıa Ǵabıdýllına tek jeńiske jetip qana qoımaı, 100 metrlik qashyqtyqqa erkin stılde júzýden jańadan álemdik rekord ornatty, - dep habarlaıdy Qamshy.kz 24.kz - ke silteme jasap. 

Ol – álem chempıonatynyń qola júldegeri, Azıa Paralımpıada oıyndarynyń ári álemniń alty dúrkin chempıony. Júzýden álemdik reıtıńte aldyna qara salmaıtyn segiz sportshynyń biri.

Aıta keteıik, kún ilgeri Rıo-2016 paralımpıadasynyń saltanatty ashylýy bolǵan edi. Saıypqyran sportshymyz jarystyń alǵashqy kúnderinde-aq Qazaqstan quramasynyń qorjynyna altyn salyp otyr.

Bıyl Rıoda 22 sport túri boıynsha 528 paralımpıada medali sarapqa túsedi. Qazaq eli alǵash ret bıyl 5 sport túri boıynsha 11 atletti dodaǵa qosyp otyr. Onyń ishinde - júzý, dzúdo, paýerlıftıng, jeńil atletıka jáne sadaq tartý bar.