Áıelder túrmesin garemge aınaldyrǵan! Tergeý qapasynda zorlanyp, qazir soty bolyp jatqan Natalá Slekıshınamen birge otyrǵan kelinshek abaqtydaǵy soraqylyqty sotta aıtyp berdi, - dep habarlaıdy Qamshy.kz KTK arnasyna silteme jasap.
Tergeý qapasynda qyz-qyrqynǵa tynyshtyq joq deıdi buryn sottalǵan áıel. Mundaǵy qyzmetkerler olardy túnimen tósekke súıreıtin kórinedi. Temir tordyń ar jaǵyndaǵy qyz-kelinshek túrmede júrip-aq júkti bolyp jatatyny sodan eken.
Marına – qapasta kóresini kórgenderdiń biri. Biraq tolyq kelinshekti qudaı saqtap tergeý abaqtysy qyzmetkerleri tópelep urǵannan aryǵa barmapty. Alaıda onymen birge otyrǵan basqa qyzdarǵa túnimen tynyshtyq joq eken.
Marına:
-Olar túńgi ekide birde kelip qyzdardy shyǵaryp alyp ketedi. Sosyn kóbi jylap oralady.
Tergeý qapasynyń qyzmetkerleri osylaısha sotyn kútken kelinshekterge kún kórsetpeıdi eken. Kúzetshisinen bastap, qalta tekserýshisine deıin kezekshilik atqarǵan túni kiltteýli esikti ashatyn kórinedi. Onda da tósektes bolatyn sottalýshyny jasyna qarap tańdaıdy.
Marına:
-Kil jas qyzdardy zorlaıdy. Kóbine 18-den 28 jasqa deıingiler.
Osy soraqylyqtyń bári endi Slekıshınanyń tergeý qapasynda zorlanýyna qatysty sotta ashyq aıtylýda. Abaqtyda aıaǵy aýyr bop qalǵandardyń sany ázirge on shaqty. Al bala kótermegeni qanshama. Jazasyn qazir ótep jatqan 32 jastaǵy Natalá Slekshınany tórt birdeı qyzmetker zorlady delingenimen, sotta tek bireýi jaýap berip jatyr. Ol túrmede týylǵan sábıdiń ákesi dep tanylǵan maıor Rýslan Hakımov. Qalǵany tek kýáger retinde qatysýda.
Aıman Omarova, N.Slekıshınanyń advokaty:
-Sotqa shaqyrylǵan qyzmetkerler jappaı jalǵan kýálik berip jatyr. Óz sózderine ózderi qarsy shyǵýda. Odan qaldy, kóptegen saýaldar jaýapsyz qaldy. Máselen, Slekıshınanyń abaqtyda zorlanǵany týraly prokýrorǵa jazǵan qaǵazynyń qaıda ketkenin túsindire almady. Osylaısha isti jabýǵa barynsha tyrysyp baǵýda.
Natalányń sábıiniń ákesi ekeni rastalǵanyna qaramastan, Hakımov sotta ózin barynsha aqtap jatyr. Aıtýynsha, Slekıshınanyń ózi tósektes bolýǵa yqylas bildiripti. Osylaı degen kúdiktiniń áleýmettik jelidegi paraqshasy seksýaldyq sıpattaǵy sýretterge tolyp tur. Qyzdar onyń esimin tósine deıin jazypty. Al sottalýshylar men túrme qyzmetkerleri arasyndaǵy teketirestiń ázirge nemen aıaqtalary belgisiz. Sot jabyq ótýde.
