Quqyq qorǵaý organdary men áskerılerge qarsy jasalǵan jazdaǵy lańkestik shabýyldardan keıin bul mekemelerde qaýipsizdik sharalary kúsheıtilýde! Polısıa ǵımarattarynyń mańaıyna kádimgi bekinis sıaqty bıik qorshaýlar ornatylyp, jańa qaqpalar qoıylyp jatyr. Buǵan qosa, syrtqy qaqpasynda baqylaý pýnktteri paıda bolǵan, - dep habarlaıdy Qamshy.kz KTK arnasyna silteme jasap.
Jazda Aqtóbe men Almatyda bolǵan qandy oqıǵalar áli de el esinde. Qos jaǵdaıda da lańkester kúsh qurylymdaryn nysanasyna aldy. Polısıa men basqa da shuǵyl qyzmetter otyrǵan ǵımarattardyń sodyrlarǵa tótep berýge jaramsyz ekeni sol kezde aıtylǵan bolatyn. Sóıtip syrtqy qorshaýlardy bekitý shuǵyl qolǵa alynypty. Qazir elimizdegi mundaı ǵımarattardyń darbazalary jappaı nyǵaıtylyp jatyr.
Ásirese, lańkester shabýyl jasaǵan nysandar basty nazarda. Sodyrlar avtobýspen buzyp ótken Aqtóbedegi áskerı bólimniń qaqpasy jańartylǵan. Tek qańyltyrdyń ornyna qaıtadan qańyltyr qoıylypty. Uzyndyǵy da adam boıynan aspaıdy. Al qaskóıler basa kóktep kirgen Almatydaǵy Almaly aýdany ishki ister basqarmasynyń ǵımaraty taspen qalanyp qorshalýda.
-Qazir bıik qorshaý men baqylaý pýnkti turǵyzylyp jatyr. Endi ǵımaratqa tek qolynda tólqujaty bar adamdar kire alady. Nemese qyzmetkerler ony shyqqansha baqylap júredi. Jyl sońyna deıin Almatydaǵy barlyq aýdandyq polısıa bólimderindegi qaýipsizdik sharalary kúsheıtiledi
Elimizdiń ózge óńirlerinde de dál osyndaı jaǵdaı. Alaıda qaýip jańa qorshaý qoıýmen seıilmeıtini anyq.
Dosym Sátbaev, saıasattanýshy:
- Jankeshtilermen bulaısha kúresýdiń esh paıdasy joq. Bári quqyq qorǵaý salasy qyzmetkerleriniń sheberligine baılanysty. Kez-kelgen jaǵdaıda shapshań jumys isteı bilý qajet. Al tastan qalanǵan qorshaýdy terrorısterdiń buzyp ótýi qıyn bolmas. Qaıta qarý-jaraq satatyn dúkenderdi baqylaýǵa alý kerek.
Buǵan qosa, quqyq qorǵaý organy ǵımarattarynyń syrtqy qaqpasynda baqylaý pýnktteri paıda bolǵan. Iaǵnı oǵan kirip-shyqqan adamdar endi burynǵydan da qatań tekserilmek.
