Memleket basshysy Nursultan Nazarbaev qasıetti Qurban aıttyń alǵashqy kúninde Ózbekstanǵa jumys saparymen baryp, kórshiles eldiń kóz jumǵan kósemi Islam Karımovtyń rýhyna taǵzym etti,-dep habarlaıdy Qamshy.kz Habar24 arnasyna silteme jasap.
Elbasy baqıǵa ozǵan baıyrǵy úzeńgilesi, táýelsiz ózbek eliniń tuńǵysh Prezıdentiniń Samarqandaǵy beıitine gúl shoqtaryn qoıyp, marqumnyń otbasyna kóńil aıtty. Búgin - muqym musylman qaýymy úshin eń ulyq mereke. Qasıetti Qurban aıt kezinde Memleket Basshysynyń tarıhy men taǵdyry tamyrlas ózbek eline at basyn burýynda da úlken mán jatyr. Elbasy Nursultan Nazarbaevty áýejaıdan Ózbekstan Prezıdentiniń mindetin ýaqytsha atqarýshy Shavkat Mırzıeevtiń ózi qarsy aldy.
Qazaqstan Prezıdenti uzaq jyldar boıy berik dostyq pen ózara tileýlestik baılanysyn bekemdep kelgen Islam Karımovtyń qazasyn barsha qazaq halqy qabyrǵasy qaıysa qabyldaǵanyn jetkizdi. Sapardyń negizgi maqsaty - artynda óshpes mura, ólmes iz qaldyrǵan tarıhı tulǵanyń rýhyna taǵzym etý. Nursultan Nazarbaevtyń bul saparyna ystyq yqylas bildirgen ózbek halqy Qazaqstanmen qarym-qatynasty arttyryp, barlyq saladaǵy baılanysty bekemdeýge múddeli ekenin jetkizdi. Elbasy irgesi birge jatqan eki eldiń eńsesin tikteý jolynda Islam Karımovtyń shoqtyǵy bıik, orny bólektigin aıryqsha atap ótti.
Nursultan Nazarbaev, Qazaqstan Respýblıkasynyń Prezıdenti:
- Búkil qazaq halqyna qınalǵan júregin jetkizý úshin men búgin Qurban aıt kúni ádeıi osy jerge kelip turmyn. Islam Abdyǵanıulynyń istegen isi, onyń memlekettik qyzmeti áli bolashaqta talaı ret zertteletin bolady. Talaı ǵasyrlarǵa ketetin bolady. Biz bilemiz istegen jumystyń barlyǵy el úshin, halyq úshin. Ózbekstandy kóterý úshin, ózbek halqyn kóterý úshin aıanbaı kúndiz-túni jumys istep barlyq ómirin, barlyq bilimin elge berdi. Sońǵy kúnge deıin jumysyn tastamady. Ózbekstannyń halqyna jaqsylyq jasady. Ózbekstandy búkil dúnıege pash etti, kórsetti. Onyń barlyǵyn ózimiz kórip otyrmyz. Sondyqtan orny tolmaıtyn qaıǵy árıne. Ásirese men úshin jaqyn dosymnan aıyryldym. Ekeýimiz bir zamanda týdyq, birge óstik. Bir kúnnen bastap el basqardyq. Ol Ózbekstandy, men Qazaqstandy. 25-30 jyldyń ishinde ár ýaqytta syrlas boldyq, birge boldyq. Sondyqtan aıtyp ketken sózderiniń barlyǵy meniń esimde. Ózbektiń maqaly bar, «Qazaqtan dosyń bolsa, joldan adaspaısyń» degen.
Qazaqstan kóshbasshysy qoıy qoralas, aýyly aralas bul elmen myzǵymas dostyqtyń orny bólek ekenin jetkizdi.
Nursultan Nazarbaev Qazaqstan Respýblıkasynyń Prezıdenti:
- My s Islamom Abdýganıevıchem podpısalı dogovor o vechnoı drýjbe ý mavzoleıa Hodjı Ahmeda Iasavı v 1998 godý ı nashı vzaımootnoshenıa vsegda osnovyvalıs na etom soglashenıı. Kazahstan vsegda býdet s ýzbekskım narodom.
Nursultan Nazarbaev qara jamylǵan otbasyǵa kóńil aıtyp, oryny tolmas qaza qazaq halqyna da ortaq ekenin jetkizdi. Taǵlymy mol tarıhı kezdesýdi túıindeı kele Elbasy Ózbekstan Respýblıkasy Prezıdentiniń mindetin ýaqytsha atqarýshy Shavkat Mırzıeevpen de kezdesti. Baýyrlastyq baılanysty nyǵaıtý aıasynda ordaly oılar saralandy. Taraptar sondaı-aq ekijaqty qarym-qatynastyń meılinshe ózekti máselelerine basymdyq berdi.
Nursultan Nazarbaev, Qazaqstan Respýblıkasynyń Prezıdenti:
- Ia ponımaıý chto perejıvaet narod vash. Ia prıehal vyrazıt skorb svoıý, velıkoe ývajenıe etomý vydaıýshemýsá syný ýzbekskogo naroda. My doljny ýkreplát otnoshenıa.
Shavkat Mırzıeev, Ózbekstan Respýblıkasy Prezıdentiniń mindetin atqarýshy:
- Qurmetti Nursultan Ábishuly Nazarbaev, taǵy da sizge óz rızashylyǵymdy bildirgim keledi. Osy bir qasıetti kúni Islam Karımulynyń rýhyna taǵzym etýge kelgenińiz úshin sheksiz alǵys bildiremin.
Kóneniń kózi Samarqannyń sar dalasyna jasaǵan Qazaqstan Prezıdentiniń bul saparyna ala taqıaly aǵaıyndar rıasyz rızashylyq bildirip, Qazaqstan men Ózbekstan tatý kórshiligin damýdyń jańa satysyna kóterip, alys-beris pen barys-kelisti artyra túsýge aıryqsha yqylas tanytty.
