QR Sybaılas jemqorlyqqa qarsy is-qımyl ulttyq búrosy Almaty oblysy aýmaǵynan «Qorǵas isi» boıynsha halyqaralyq izdeýde bolǵan sońǵy kúdikti Bekbolat Qaıyrbaevty ustady,- dep habarlaıdy Qamshy.kz  365info.kz - ke silteme jasap.

Bul týraly atalǵan vedomstvonyń baspasóz qyzmeti habarlady.

Taratylǵan aqparatqa qaraǵanda, ol uıymdasqan qylmystyq toptyń jetekshisi Talǵat Qaıyrbaevtyń týǵan baýyry.  Bekbolat Qaıyrbaev uıymdasqan qylmystyq top múshelerine qatysty qylmystyq qýdalaýdy toqtatý maqsatynda quqyq qorǵaý organdaryndaǵy joǵary laýazymdy tulǵalardy satyp alý josparyn júzege asyrýda baılanystyrýshy býyn bolǵan.

Aǵasynyń tapsyrmasymen áreket etken ol, tanystary M.Zımanov, Ý.Áýbákirov, Qusmanov pen R.Júsipov arqyly laýazymdy tulǵalarǵa 3,2 mln. dollar para bergen. Olar óz kezeginde Talǵat Qaıyrbaevty qylmystyq jaýapkershilikten bosatýy tıis bolǵan.

Bekbolat Qaıyrbaevqa 2012 jyldyń naýryzynan bastap izdeý jarıalanǵan.

Qazirgi ýaqytta ol Taldyqorǵan qalalyq ishki ister basqarmasynyń ýaqytsha oqshaýlaǵyshyna qamaldy.

Aıta keterligi,  QR Sybaılas jemqorlyqqa qarsy is-qımyl ulttyq búrosy «Qorǵas isine» qatysy bar uıymdasqan qylmystyq toptyń izdeýde bolǵan barlyq múshelerin ustady.

Eske sala ketelik, «Qorǵas isi» boıynsha 45 adam sotty bolǵan. Olardyń 43-i qamaýǵa alynǵan. Aıyptalýshylardyń kóbi keden qyzmetiniń aımaqtyq organdary men Ulttyq qaýipsizdik komıtetinde joǵary laýazymdy sheneýnikter bolǵan.

Sot pikiri boıynsha, uıymdasqan qylmystyq top uzaq ýaqyt boıy Qytaıdan Qazaqstanǵa kontrabandalyq jolmen taýarlar ótkizip otyrǵan. İs materıaldarynda atalǵan qaýymdastyqtyń «asa iri kólemde ekonomıkalyq kontrabandany ótkizgeni» aıtylǵan.

Bul istegi basty tulǵalar — Talǵat Qaıyrbaev bas bostandyǵynan 16 jylǵa, al Baqyt Otarbaev 13 jylǵa aıyryldy.