Óskemende ótken «Altaı – túrki áleminiń altyn besigi» atty halyqaralyq konferensıanyń aıasynda arheologıa salasynyń máseleleri jáne 2016 jyly Shyǵys Qazaqstanda 5 ejelgi eskertkishte júrgizilgen qazba jumystarynyń nátıjeleri talqylandy.
Shara aldynda konferensıaǵa qatysýshylar men qala turǵyndary úsh kıiz úıge qoıylǵan Berel qorǵandary, Shilikti jazyǵy, Ablaıkıt bekinis-ǵıbadathanasy, Qyryqúńgir eskertkishi jáne Eleke sazy jerindegi qazba jumystary kezinde tabylǵan buıymdardy tamashalady. Eń basty jádigerler – «Altyn adam» men Berel jazyǵyndaǵy №11 qorǵannan tabylǵan jylqynyń kóshirmeleri Mádenıet saraıynyń dálizinde jıynǵa qatysýshylardy qarsy aldy.
Plenarlyq otyrys barysynda ǵalymdar arheologıa ǵylymynyń jáne Shyǵys Qazaqstanda tabylǵan tarıhı jádigerlerdi saqtaý men ony murajaıǵa qoıýdyń ózekti máselelerin talqylady. Arheologtardyń pikirinshe, bul – óńirdiń mádenı jáne ekonomıkalyq damýyna, týrısik ınfraqurylymnyń qalyptasýyna oń áser etedi.
- Ǵylymı-zertteý jumystaryn bizdiń óńirde júrgizý qajettiligi kúmán týdyrmaıdy. Mundaı jumystar zerttelgen nysandardy IýNESKO-nyń búkilálemdik muralarynyń qataryna qosý úshin qajetti teorıalyq negizin jáne óńirimizdiń mádenı brendin qalyptastyryp, týrısik áleýetiniń artýyna sep bolmaq. Qazba jumystarynyń nátıjesinde tabylǵan jádigerler oblysymyzda qalyp, jastarymyzdyń patrıottyq tárbıesi úshin qyzmet etetin bolady, - dedi SHQO ákimi Danıal Ahmetov.
Sonymen qatar aımaq basshysy tabylǵan zattardyń oblystyq tarıhı-ólketaný murajaıyna beriletinin habarlady.
Konferensıanyń aıasynda Katonqaraǵaı aýdanynyń Berel jazyǵynda elimizde balamasy joq aspan astyndaǵy murajaı ashylǵanyn atap ótý kerek. Mundaı murajaı kelesi jyly Shilikti jazyǵynda da salynbaq.
