Ulttyq ǵylymı ana men bala ortalyǵynda Aqtaýda zorlanǵan kishkentaı Vıkany qoldaýǵa baǵyttalǵan aksıa ótti, - dep habarlaıdy Qamshy.kz QazAqapartqa silteme jasap.

Elorda ákiminiń orynbasary Ermek Amanshaev, 2016 jylǵy Olımpıada júldegeri Gúzel Manúrova, telejúrgizýshi Dınara Satjan, akter Ánýar Nurpeıisov pen ánshi Aıgúl Imanbaeva arnaıy jasalǵan úmit buryshyna jumsaq oıynshyqtar ákelip qoıdy. Bul týraly ákimdiktiń baspasóz qyzmetinen málim etti.

Vıkanyń eki ájesi aýrýhanada táýlik boıy kezekshilik etýde. Vıka aýrýhanaǵa 27 tamyzda óte aýyr halde jetkizildi, qazirgi kezde ol stasıonarlyq em qabyldaý ústinde.

«Uıymdastyrý, materıaldyq qoldaý jaǵynan bári de qarastyrylǵan, bastysy, esine kelip, saýyǵyp ketse eken. Bul óte aýyr jaǵdaı, qoǵam pedofılıamen birigip kúresýge tıis, osyndaı aýyr qylmys jasaǵandar zań boıynsha qatań jazalanýy kerek», - dedi Ermek Amanshaev.  

Erte jastaǵy nevrologıa bóliminiń meńgerýshisi Altynshash Jaqsybaevanyń aıtýynsha, Vıka qazir úshinshi dárejedegi komada jatyr.

«Naýqastyń hali óte nashar, fýnksıalardy qalpyna keltirý boıynsha boljamdar kóńil kónshiterlik emes. Ókinishke oraı, oryn alǵan jaǵdaıdyń saldarynan qyzdyń mıyna ottegi jetkilikti mólsherde jetkizilmegen, sonyń nátıjesinde bas mıy aýyr zardap shegip, jumys istemeıdi», - deıdi dáriger.

Olımpıada júldegeri Gúzel Manúrova oryn alǵan oqıǵaǵa baılanysty mektepterde ózin-ózi qorǵaý, sondaı-aq balalardy osy sıaqty jaǵdaılardan saqtaý úshin kóshede ózin-ózi ustaný erejelerin túsindirý boıynsha sabaqtar engizýdi usyndy.