Qazaqtyń birtýar uly, ult rýhanıatynyń janashyry Asqar Ánýaruly Jákýlın aqpan aıynyń basynda aýyr naýqastan kóz jumǵan bolatyn. Hal ústinde jatqan Asekeń sonda jary Jaına Jákýlınaǵa júrekjardy sózderin tizip hat jazǵanyn da bilemiz. Asyldyń synyǵy, tektiniń tuıaǵy Asqardaı azamatynan aırylǵan marqumnyń jary Jaına áleýmettik jelide Asqarsyz ótken kúnderi týraly tolǵanystary men jaqyn dostary men janashyr jandarǵa rızashylyq bildirgen hatyn jarıalady. Tómende Jaına Jákýlınanyń jan jarynyń óshpes rýhyna arnaǵan hatyn nazarlaryńyzǵa usynyp otyryz.
Men ózimniń súıikti jarym Asqar Jakýlındy eske alamyn. Ótken birneshe aıdyń ishinde biz ózgeshe bir kúnderdi bastan ótkerdik. Osy sátte men barlyq bizge kóńil bólgen, jaqynnan járdemshi bolǵan dostaryma alǵysymdy bildiremin. Sender maǵan shynaıy mahabbat pen jylýlyqty sezindirdińder.
Sonymen qatar, qol qýsyryp qarap turyp ta sol bir qudyqtaǵy qurdymǵa tas atqandarǵa da sheksiz alǵysymdy aıtamyn. Sender meni odan ári erjúrek, qaıratty etip baýlydyńdar.
Asqar ekeýmiz Chıńhýa ýnıversıtetinde tanystyq. Sóz baılastyq. Ultymyz uqsamaǵan bizder on eki jyldan keıin ǵana eki jaq ata-ananyń rızashylyǵyna qol jetkizdik. Biz bir-birimizge keremet ǵashyq boldyq, senimdi serik, ata-ana boldyq, qyzmettegi qanattaspyz, tipti eń jaqsy dostardan bola bildik. Ómirdiń ashshy-tushshysyn birge tattyq, qas qaǵym sátteı bolsa da biz Allaǵa myń márte alǵys aıtamyz. Eger ómirge qaıta kelsek biz taǵy tańsholpannyń aınalasynan oryn tapqan erli-zaıypty bolǵandy qalar edik.
«Men úshin ómirimdegi eń keremet oqıǵa - Qazaqstannyń táýelsizdik alýy, eń uly sheshimim - Qazaqstanǵa qonys aýdarýym»... Asqar kókiregin ot kernep qulshyndy, talpyndy, kúresti, ánin asqaqtatty, qajyrly boldy, ol otanyna qaryzdar emes, óz ómirine de qaryzdar emes,
Asqar ketti. Artynda uly men qyzy qaldy. Árkez qyzymnyń janary jasqa boıalyp, ulym ákesiniń keskinin kórgeninde de bizdiń endigi keshetinimiz tozaq azabyndaı elesteıdi.
Asqar ketti. Artyna ol Aqsýatyn da qaldyryp kete berdi. Onyń oryndalmaǵan uly isi qaldy, men onyń saýytyn jamylyp tulparyna minip eshteńeden jasqanbaı kúrese beremin!
Asqar ketti. Artynda qalǵany – onyń rýhy men armany, onyń aqyl-parasaty men ádilettiligi, seri beınesi men asqaq kúlkisi, ony súıetin halqynyń sanasynda qalqyǵan kerim tulǵasy.
Ylaıym Alla Asqardyń janyn Jannatta qylǵaı! Onyń dostary men otbasyna Allam jar bolsyn, Alla onyń jan tánimen súıetin ulty men osy kıeli topyraǵyn aman saqtasyn! AÝMIN!
Jaına,
2016 jyldyń 12 qyrkúıegi, Qurban aıt kúni
Almaty.
