Keıki batyrdyń bas súıegi búgin tańǵy saǵat 04:50-de Máskeýden arnaıy bortpen elordaǵa jetkiziletinin estigender Astanadaǵy halyqaralyq áýejaıǵa jınaldy. Alaıda, bas súıektiń bul ýaqyttan buryn arnaıy reıspen jetkizilýine baılanysty jınalǵan qaýym ony saltanatty túrde qarsy ala almady. Bul týraly  Qamshy.kz QazAqparat-qa silteme jasaı otyryp  habarlaıdy.

«Bizdiń estigen aqparatqa súıensek, batyrdyń bas súıegi arnaıy reıspen kelip jatyr. Osy oraıda elimizdiń tanymal ǵalymy, belgili etnograf, profesor Nursan Álimbaı Reseıde bas súıekti qabyldap alyp, elge jetkizdi dep estidik. Endi ǵalymdar arnaıy saraptama ótkizetin bolar. Batyr babanyń bas súıegin saltanatty túrde qarsy alý kerek edi, óıtkeni Astana áýejaıyna el azamattary, batyrdyń urpaqtary men týystary keldi. Bul turǵyda kúndiz úkimet resmı túrde óz málimdemesin jasaıdy degen oıdamyn», - dedi saıasattanýshy, qoǵam qaıratkeri Berik Ábdiǵalıuly.

Budan buryn ol Feısbýktegi paraqshasynda búgin tańerteń 04:50-de Máskeýden arnaıy bortpen 1916 jylǵy ult-azattyq kóterilisiniń batyry, 1923 jyly bólshevıkter qolynan qaza tapqan Keıki batyrdyń bas súıegi ákelinetinin habarlaǵan edi.

«Qazaqstan men Reseı Úkimetteri arasyndaǵy ýaǵdalastyq aıasynda Keıkiniń bas súıegi jetkizilip tur. Meniń estýim boıynsha arnaıy komısıa qurylyp, jerleý máselesin qarastyrady. Sonymen qatar batyrdyń esimin qaıta jańǵyrtýǵa baılanysty is-sharalar qamtylyp, aldaǵy ýaqytta naqty qaı óńirde jerlenetini talqyǵa salynady. Árıne, halyq pen batyrdyń týystarynyń oıy ekige bólinip tur. Bireýler Astanadaǵy Ulttyq panteonǵa, al keıbireýler Qostanaı oblysynyń Amangeldi aýdanyndaǵy kesenege qoıylsa degen tilekterin aıtýda. Osy rette bul usynystar qarastyrylyp, tıisti sheshim qabyldanady», - dedi Ábdiǵalıuly.

Eske sala ketsek, reseılikter tarapymen jádigerdi elge qaıtarýǵa kóp jyldan beri kelissózder júrgizildi.