QR İshki ister mınıstri Qalmuhanbet Qasymovqa
Qurmetti Qalmuhanbet Nurmuhanbetuly!
Almaty oblysy Jambyl aýdanynyń ortalyǵy Uzynaǵash kentinde 18 qyrkúıek kúni mal bazaryna mal ákelgen 1979 jylǵy Doldanuly Jarqynbek, 1973 jylǵy Zarlyhanuly Muqıat pen Álimhan Qadylbek esimdi azamattardyń joǵalǵanynan habardar bolarsyz. Jergilikti polısıa qyzmetkerleri men joǵalǵan azamattardyń týystary, dostary men eriktiler úsh azamatty bir apta boıy izdestirdi. Ókinishke oraı, búgin joǵalǵan úsh azamattyń da qaza bolǵany habarlandy. Beısenbi, juma kúnderi joǵalǵan jigitterdiń eki birdeı kóligi tabyldy, keshe Uzynaǵash mańynan joǵalǵan jigitterge tıesili 40 bas iri qara maldyń 33-i tabylǵan.
Joǵalǵan kisilerdi izdeý jumystaryna Almaty oblystyq İİD, Jambyl aýdandyq İİB, basqa da aýdandardyń polısıa qyzmetkerleri jumyldyrylǵan. Alaıda, izdeý jumystarynyń bir aptaǵa jýyq ýaqytqa sozylýy polısıa qyzmetkerleriniń kásibı biliktiligine kúmánmen qaraýǵa májbúr etip otyr. Zat emes, adam, bir ǵana adam emes, úsh birdeı azamatty, eki kóligi, 40 bas iri qara malymen alaqandaı aýdan ishinde osynsha ýaqyt izdeý polısıa qyzmetkerleriniń Elbasy qoıyp otyrǵan kásibı biliktilik talabynyń údesinen shyqpaǵanyn kórsetedi. Bul jerde joǵalǵan mal men eki kóliktiń tabylýyn polısıa qyzmetkerleriniń eńbek kórsetkishi deı almaıtynymyz da anyq. Dalada jaırap jatqan kólik pen qaraýsyz jaıylyp júrgen maldy turǵyndar kórip, habarlaǵan.
Joǵalǵan azamattardyń týystary men olardy izdeýge atsalysqan eriktiler de polısıa qyzmetkerlerinen osy oqıǵaǵa qatysty tolymdy aqparat ala almaǵandaryna shaǵymdanýda. Sonyń saldarynan olardyń arasynda «Bul uıymdasqan qylmystyq toptyń isi eken. Polısıanyń ol topqa shamasy kelmeıtin kórinedi» degen de áńgime tarady. Osy oraıda, atalǵan oqıǵa týraly oqyrmanǵa obektıvti aqparat berý maqsatynda Almaty oblystyq İİD baspasóz qyzmetinen de izdeý jumystarynyń barysy týraly málimet ala almaǵanymyzdy aıta ketken jón.
Qurmetti Qalmuhanbet Nurmuhanbetuly!
Tek Almaty oblysy aýmaǵynda ǵana emes, búkil respýblıka jurtshylyǵy kóz tikken bul oqıǵanyń qanshalyqty qoǵamdyq rezonans týdyrǵany týraly aıtyp jatý artyq bolar. Sondyqtan da Sizden osy istiń mán-jaıyn anyqtap, tergeý barysyn jeke baqylaýyńyzǵa alýyńyzdy ótinip suraımyz. Qoǵam nazary aldaǵy tergeý sharalaryna da jiti baǵyttalatynyn, marqumdardyń týystary, dostary qylmysqa qatysy bar tulǵalardyń anyqtalyp, tolyqtaı jazalanýyn talap eteri sóziz. Tergeý kezinde zańdylyqtyń, prosesýaldyq talaptardyń saqtalmaýy syndy kemshilikter oryn alsa, jábirlenýshi taraptyń polısıa qyzmetine kúdigin kúsheıtip, tipti, áleýmettik arazdyq týǵyzatyn jaǵdaılarǵa alyp barýy múmkin.
Basqa aqparat quraldarymen birge, Qamshy.kz aqparattyq portaly da osy isti jiti baqylap, tergeý barysyn qadaǵalaıtynyn eskertemiz.
