R Prezıdenti Nursultan Nazarbaev Astanada Qazaqstannyń Ulttyq horeografıa akademıasynyń ashylýyna qatysty.

«Barshańyzdy jańa óner ordasy – Qazaqstannyń ulttyq horeografıa Akademıasynyń qurylysynyń aıaqtalýymen shyn júregimmen quttyqtaımyn. Bul elordamyzdyń taǵy da bir keremet ǵımaraty, teńdesi tek qana bizdiń elordamyzda ǵana emes, barsha Ortalyq Azıa elderinde joq ǵımarat bolyp sanalady. Bul Táýelsizdigimizdiń 25 jyldyǵyna arnalǵan tartý bolyp otyr. Horeografıa akademıasy otandyq bı óneriniń qarashańyraǵy bolatynyna senemin» dedi Elbasy.

Prezıdenttiń atap ótýinshe, akademıa Ulttyq joǵary oqý orny mártebesin alyp otyr. Memleket basshysy, sonymen qatar, bul bilim ordasynyń qurylysy búdjettik emes qarajattarǵa salynǵandyǵyn atap ótti.

«Memlekettiń mereıi rýxanıat óneriniń deńgeıimen de kórinip turýy kerek. Bul rette akademıaǵa zor senim artylady. Osyny eskere kele, bilim oshaǵyna arnaıy ulttyq joǵary oqý orny mártebesin berdik. Astana opera teatry ashyldy. Almatyda Abaı atyndaǵy akademıalyq opera jáne balet teatry bar. Shymkentte opera jáne balet teatry bar. Birneshe qazaqstandyq bı ansámblderi bar. Solardyń barlyǵyna maman daıarlaıtyn, búkil 1-synyptan bastap, joǵary bilim alatyn, doktorantýrasyn bitirip shyǵatyn mundaı mektep esh jerde joq. Bul – júz jylda, myń jylda salynatyn mektep. Sondyqtan osynyń barlyǵyn biz qadirleı bilýimiz kerek. Otandyq mádenıettiń jańarýyna memleket birinshi kúnnen bastap kóńil bólip kele jatqandyǵyn bilesizder. Biz mádenıet jylyn jarıalap, búkil Qazaqstanda mádenıet oshaqtarynyń barlyǵyn jańǵyrttyq. Qaıtadan iske asyrdyq. Jańadan teatrlar ashyldy. Daryndy jastardyń maman bolyp shyǵýyna barlyq jaǵdaı jasap kelemiz. Qazaqstannyń qaıtalanbas ónerin álemdik saxnaǵa shyǵarý úshin daıyndyq kerek, árıne» dep túıdi sózin N.Nazarbaev.

QR Mádenıet jáne sport mınıstri Arystanbek Muxamedıulynyń aıtýynsha, atalmysh akademıa tabaldyryǵyn búgin 498 tárbıelenýshi alǵash attamaq.