Respýblıkamyz boıynsha qaryshtap damyp kele jatqan aımaqtardyń biri – Atyraý oblysy. El Táýelsizdiginiń 25 jyldyǵyn munaıly ólke úlken jetistiktermen qarsy almaq. Óńir ekonomıkasynyń negizgi tiregi munaı-gaz sektory ekeni daýsyz. Sonymen qatar oblysta túrli salany qamtıtyn iri kásiporyndar boı kóterip, shaǵyn jáne orta bıznes pen aýylsharýashylyǵy salasy qatar damydy. Osynyń arqasynda sońǵy jyldary óńir ekonomıkasynyń damý baǵyty aıqyndalyp keledi, dep habarlaıdy BNews.kz tilshisi.
2015 jyly Atyraý oblysynda óndirilgen jalpy aımaqtyq ónim 4 trıllıon teńgeden asyp tústi. Al 25 jyl buryn bul kórsetkish 900 esege az, ıaǵnı 4,5 mıllıard teńgeni ǵana quraıtyn. Munaı-gaz sektorynda ǵana ǵana emes, jeńil jáne aýyr ónerkásip, aýylsharýashylyǵy salalarynda respýblıka boıynsha balamasy joq jobalar júzege asyryldy. Osynyń arqasynda aımaqqa syrttan tasymaldanatyn taýarlar yǵystyrylyp, ishki naryq jergilikti ónimdermen qamtamasyz etildi.
«Buǵan Prezıdenttiń tapsyrmasyn oryndaý baǵytyndaǵy «Bıznestiń jol kartasy-2020», «Jumyspen qamtý-2020» baǵdarlamasy úlken septigin tıgizip otyr. «Nurly jol» baǵdarlamasy aıasynda orta jáne shaǵyn bıznesti, ınfraqurylymdy damytýǵa bólinip jatqan qarajattardyń arqasynda Atyraý oblysy kókónis, kartop, sábiz pıaz jáne basqa túrlerimen ózin-ózi qamtamasyz etip otyr»,- deıdi oblys ákimi Nurlan Noǵaev.
Táýelsizdiktiń alǵashqy jyldary ózge oblystar sekildi munaıly óńir de qıyn kezeńdi bastan keshirgeni belgili. Al 25 jyldan soń aımaq tanymastaı ózgerdi. Halyq qazbaly baılyqtyń ıgiligin kórip otyr. Álemdik deńgeıdegi alpaýyt kompanıalar birqalypty damý úrdisi bar Qazaq eline esh kúmánsiz ınvestısıa salyp, shetelmen birikken kásiporyndar jemisti jumys isteýde.
Oblystyq máslıhattyń depýtaty Aleksandr Dýmler: «Prezıdent: «Aldymen ekonomıka, sodan keıin saıasat degen bolatyn». Aldymen ekonomıkalyq jaǵdaıdy turaqtap alýdyń rastyǵyna búginde anyq kóz jetkizdik. Táýelsizdik degendi eń aldymen árbir turǵynnyń jaqsy ómir súrýi, memleket qamqorlyǵyn sezinýi dep bilemin» deıdi.
Búginde Atyraý oblysy ózge aımaqtarmen salystyrǵanda kóptegen sala boıynsha kóshbasshy sanalady. Sońǵy jyldary júzege asyrylǵan tyń jobalar óńirdegi shaǵyn jáne orta bıznestiń serpindi damýyna aıtarlyqtaı úles qosty. Atap aıtqanda azyq-túlik, aýylsharýashylyǵy, mashına jasaý, munaı-gaz óndirisine servıstik qyzmet kórsetý salasyndaǵy serpindi jobalar aımaq ekonomıkasynyń órleýine uıytqy bolyp otyr.
«Búgingi kúni kásipkerlerge memlekettik qoldaý jasalyp otyr. Bıznes ókilderi alyp satarlyqpen aınalysyp qana qoımaı, ónim óndirýdi jáne ónimdi eksportaýdy qolǵa aldy. Bul 25 jylda Qazaqstannyń qol jetkizgen tabysy. Búginde Atyraý oblysynda 50 myńnan asa kásipkerlik sýbektisi bar, ol kásipkerler 120 myń adamdy jumyspen qamtyp otyr»,- deıdi oblystyq kásipkerler jáne jumys berýshiler odaǵynyń tóraıymy Alıa Bekqojıeva.
Oblys aýmaǵynda ındýstrıaldyq karta jáne kásipkerlikti qoldaý baǵdarlamalary boıynsha 2 trıllıon teńgeniń 52 ınvestısıalyq jobasy júzege asyrylyp jatyr. Osy jobalar negizinde 5,5 jańa jumys orny ashylmaq. Sonymen qatar 37 mıllıard dollar qarjy salynǵan Teńiz kenishin ıgerýdiń bolashaq damý jobasy jylyna 12 mıllıon tonna shıkizat óndirýge múmkindik beredi. Jańa joba qurylysy aıasynda qosymsha 20 myń jumys orny ashylatyn bolady.
