Batys Qazaqstan oblysy Táýelsizdiktiń 25 jyldyǵyna qyzý daıyndalyp jatyr. Merekege oraı, oblysta jańadan birneshe nysan paıdalanýǵa beriledi. Bul týraly búgin Ortalyq komýnıkasıalar qyzmetinde Batys Qazaqstan oblysy ákiminiń orynbasary Arman Óteǵulov aıtty, dep habarlaıdy BNews.kz.

«Táýelsidiktiń 25 jyldyǵyna oraı, 20 qarasha men 15 jeltoqsan aralyǵynda «Juldyzdy 25 kún» ótkiziledi. Odan bólek, 60-tan astam iri shara uıymdastyrylady. Ataýly merekege oraı birneshe áleýmettik nysan paıdalanýǵa berildi. Sonymen qatar, Oral qalasynyń turǵyndaryna 90 myń sharshy metr, ıaǵnı, 1562 páter kilti tapsyrylady. Oqýshylar saraıy, kópsalaly aýrýxana jeltoqsan aıynyń basynda ashylady. Qazirgi tańda oblysta 7150 jumys orny ashyldy. Sonyń ishinde «Jol kartasy 2020» baǵdarlamasy aıasynda 2235 adam jumyspen qamtyldy. Úsh aýysymdy mektepter problemasy joıyldy. Oblys turǵyndaryn sý jáne gazben qamtý oń sheshildi. Búgingi tańda Batys Qazaqstan oblysynyń 89 paıyzy sýmen qamtyldy», - deıdi Arman Óteǵulov.
Aıta keteıik, Qazaqstan Respýblıkasy Táýelsizdiginiń 25 jyldyǵyna oraı Astana qalasynda Elbasynyń tapsyrmasymen «Qýatty óńir – qýatty Qazaqstan» atty óńirler kúni bastalyp ketken bolatyn. Osy aptanyń senbi-jeksenbi kúnderinde Batys Qazaqstan jáne Atyraý oblysynyń kúnderi ótedi.
Batys Qazaqstan oblysynyń aýyl sharýashylyǵy jármeńkesine 12 aýdan men Oral qalasynyń kásipkerleri qatysady. Jármeńkede 200 tonnadan astam kókónis, et, konservi, un jáne makaron ónimderi, bal, balyq, kvas, shyryn, sýsyn jáne t.b. satylady. Beıbitshilik jáne kelisim saraıynda Batys Qazaqstan oblysynyń tarıhı-ólketaný murajaıynyń «Aqjaıyq arý mekenim» taqyryptyq kórmesi kópshilik nazaryna usynylady. 18 qyrkúıekte saǵat 16.00-de Dáýletkereı atyndaǵy qazaq halyq aspaptary orkestriniń, Batys Qazaqstan oblysy ákiminiń estradalyq-sımfonıalyq orkestriniń, «Nazerke», «Aqjaıyq» bı ansámblderiniń jáne t.b. óner ıeleriniń qatysýymen gala-konserti ótedi.