Bıyl tórtkúl dúnıege aty máshhúr qazynaly Mańǵystaý túbegindegi  Jetibaı munaı ken ornynyń ashylǵanyna 55 jyl, «Jetibaımunaıgaz» óndirý basqarmasynyń qurylǵanyna 50 jyl tolyp otyr. Osynaý qos mereke qarsańynda bul ken ornynyń ótken tarıhyna kóz júgirtip, ardager azamattardyń esimderin el jadynda taǵy bir márte jańǵyrtyp, atap ótkendi jón sanadyq.

Qazynaly óńirge munaı barlaýshylarynyń tabany tuńǵysh ret 1958 jyly tıdi. Oǵan deıingi Qyzan men Túbijiktegi munaı kózin izdestirý jumystary úmitti aqtamaǵan soń «Mańǵystaýmunaıgazbarlaý» («MMGB»-«MNGR») tresiniń Dúısen Úsenov bastaǵan burǵylaý brıgadasy men seısmıkalyq barlaý brıgadalary Ońtústik Mańǵystaýǵa – Jetibaı jerine qonys aýdardy. Jetibaı munaı barlaý ekspedısıasynyń basshylyq quramynda R.Saǵyndyqov, esepteý-josparlaý, jabdyqtaý jaǵynda H.Beıseýov, A.Aıaǵanov, S.Qanalıev, L.Eńsegenov, B.Báshenov, A.Bólekbaeva, N.Nurjanov, M.Jolboldınder jumys jasady. 

Munaı barlaý jumysyn qarjylan­dyrýmen Jańbyrbaı Luqpanov aınalysty. Ekspedısıa­nyń bastaýysh partıa komıtetiniń tóraǵasy Mustash Qusaıynov, kásipodaq komıtetiniń tór­aǵasy Mantyq Tóleý­ǵalıev, zańgeri Shamsýtdınov boldy.
Jetibaı ken alańyndaǵy eń birinshi tereń burǵy jer qoınaýyna 1959 jyldyń 24 qańtarynda  jiberilgen bolatyn. Biraq birjarym jyl boıy úlken eńbekpen qazylǵan uńǵy 1960 jyldyń 20 shildesinde 2658 metr tereńdikte burǵylaý qubyry zaboıda ustalyp qalyp, apatqa ushyraǵan soń qazý jumystary toqtatyldy. Bul jumystyń asa aýyr bolǵany sonsha, áýeli Iý.Kýznesov,  J.Muqatov,  K.Tarabrınder basshylyq etetin brıgada burǵylap bastaǵan uńǵyny qazý kezinde 8 burǵylaý sheberi aýysty. Degenmen, jumys nátıjesiz bolǵan joq. Uńǵynyń tereńdigi 2500 metrden asqan kezde ortalyq ıýra shógindisinen kernge sińgen munaı belgisi alyndy.
Ekinshi №2 uńǵyny Salyq Rysqalıev bastaǵan brıgada 1959 jyldyń 5 tamyzynda qazyp bastady. Bul uńǵyny burǵylaý jumystary da ońaı bolǵan joq. Burǵyshylardyń eren eńbeginiń arqasynda 1960 jyldyń aqpanynda 1700 metr tereńdikten taǵy da munaı sińgen kern anyqtaldy. Bul kern túgelge jýyq munaı bolyp shyqty. 1960 jyly qazan aıynda osy ustalyp qalǵan burǵylaý qubyry óndiristik qubyrdyń ornyna shegendelip, 1905-1909 metr tereńdikten táýligine 1,6 tekshe metrdeı taza munaı alyndy. Bul óte joǵary sapaǵa ıe Mańǵystaýdyń tuńǵysh munaıy edi. Biraq ol úlken óndiristik munaı bolmaǵandyqtan 1960 jyldyń 8 mamyrynda Jetibaı jeriniń qoınaýyna úshinshi tereń burǵy jiberildi. Bur­ǵylaý sheberi Nıkolaı Petrovtyń brıgadasy qazǵan bul №6 uńǵy da 2608 metrge jetken kezde apatqa ushyrady. 1961 jyldyń 21 maýsymynda qashaýdy aýystyryp, burǵylaý qubyryn uńǵyǵa jiberý kezinde 2420 metr tereńdikte qubyr taǵy da ustalyp qaldy. «Apatqa kináli» dep tanylǵan N.Petrov qyzmetinen bosatylyp,  eńbek demalysyna jiberildi. Razvedka bastyǵy D.Úsenov pen aǵa ınjeneri H.Aldaqovtyń ornyna Túbijiktegi geologıalyq barlaý-burǵylaý alańynyń bastyǵy Hasan Tájıev pen aǵa ınjener Qýan Qazıev taǵaıyndaldy.
Aqyry Mańǵystaý munaıynyń ashylǵan kúnin tarıhta altyn áriptermen aıshyqtap qaldyr­ǵan 1961 jyldyń 5 shildesi de kelip jetti. Naq sol kúni túngi saǵat 2-den 40 mınýt ótkende burǵylaý sheberi Bısenǵalı Bájikovtiń vahtasynda H.Tájıev, Q.Qazıev, V.Teváshevtar basshylyq etetin Jetibaı munaı barlaý alańyndaǵy  №6 uńǵydan 2383-2389 metr tereńdik aralyǵynan qýatty munaı burqaǵy atyldy. Mańǵystaý munaıynyń bastaý-bulaǵy osy kún boldy.
Jer qyrtysynyń tereń ıýra qabatynan úlken qysymmen aspanǵa atqylaǵan munaı burqaǵynyń kúshti bolǵany sonshalyq, bıiktigi 53 metrlik burǵylaý munarasynyń krany kórinbeı qaldy. Fontan úsh kún boıy atqylap, 3 myń tonna munaı shyǵardy. Munshalyqty qýatty munaı burqaǵyn aýyzdyqtaý burǵyshylarǵa ońaıǵa túsken joq. Úsh kún boıy arpalysyp, uńǵydan atylǵan qýatty munaı burqaǵyn aýyzdyqtaǵan qaharman burǵyshylardyń qatarynda Bısenǵalı Bájikov, Sabyrbaı Shontybaev, Kemelhan Berikbosynov, Bidán Qalıev, Ońǵar Qabjanov, Qaıyp Azanbaev, Shákirt Sahanov, Qalabaı Qystaýbaev, Naızabek Toltyrbaev, Kesikbaı Naýanov, Tólebek Ómirbaev, Aımaǵanbet Álıev, Kesikbaı Ótegenov, Sergeı Levıskıı, Ońaı Buqabaev, Mıhaıl Jýkovskıı, Nurmahan Qanatbaev, Josaly Qystaýbaev, İzturǵan Súıindikov, Atabaı Tóremuratov, Ermuhan Taýjanov, Dárish Toqjanova, Turmuhanbet Kenebaev, Qojahmet Qaldybaev, Itkúshik Baıjanov, Rústem Júzbaev, Muhtar Eralıev, Petr Trıfonovıch Shamraı, Qantóre Qýanyshbekov, Leonıdas Kerýlıs, Sanatbaı Masatov, Saılaýbaı Smaǵulov, Jáký Álıev, Sabyr Bısenov, Tólesin Ómirbaev, Myrzabek Ońǵalıev, Atyraýbaı Aıaǵanov, A.Nurǵalıev, Baıjanov, Bopylov, t.b. boldy. Uńǵydan atylǵan munaıdyń táýliktik ónimi 400 tonnaǵa deıin jetti.
  Sóıtip, bul qýanyshty habar dúnıe júzin dúr silkindirip, qıyrda jatqan Mańǵystaý túbeginde munaı qorynyń ashylǵanyn jáne ony ıgerý kezeńi bastalǵanyn búkil álemge pash etti. El qulaǵyn eleń etkizgen erekshe oqıǵa jóninde Keńester Odaǵyndaǵy búkil radıolar men telearnalar súıinshi surap, respýblıkalyq, odaqtyq basylymdar ǵana emes, sheteldik buqaralyq aqparat quraldary da jarysa jazyp jatty. Bul kún budan bylaı Burǵyshylar kúni bolyp belgilendi. Osynaý uly oqıǵa Mańǵystaý ólkesi ómirbaıanynyń jańa, jarqyn betteriniń ashylǵanynyń belgisi boldy. Osydan keıin aımaqtyń ónerkásibin keń kólemde ıgerý bastaldy.
  Mańǵystaý munaı epopeıasynyń bastaý-bulaǵy bolǵan Jetibaı munaı-gaz kondensat ken orny ashylǵan soń 1965 jyldyń 13 aqpanynda KSRO Memlekettik qor komıteti Jetibaı ken ornyndaǵy munaı qoryn resmı túrde bekitti. Ol boıynsha ken ornynyń geologıalyq qory 375 mıllıon 653 myń tonna dep esepteldi.
  Qazaq KSR Mınıstrler Keńesiniń 1966 jylǵy 11 mamyrdaǵy №750-R qaýlysyna oraı shyǵarylǵan «Qazaqstanmunaı» birlestiginiń 1966 jylǵy 27 mamyr kúngi №183/P buıryǵymen «Jetybaıneft» munaı kásipshiligi basqarmasy quryldy. Basqarma bastyǵy Saǵıdolla Nurjanov, bas ınjeneri Sýsyn Qaljanov, bas geology Beken Álıev boldy. Sol jyldyń 30 jeltoqsanynda Jetibaı ken ornyndaǵy úsh uńǵy munaı óndirýdi bastady da, kenish ónerkásiptik paıdalanýǵa berildi. 1967 jyly 1 qańtarda Jetibaı ken ornynda eń birinshi bolyp salynǵan 14 uńǵydan turatyn №8 toptyq qondyrǵy túgel paıdalanýǵa berildi. Bul toptyq qondyrǵynyń jumysyn Embiden kelgen kánigi munaıshy Haırolla Árenuly Ihsanǵalıev basqardy.
  Jetibaıdyń munaıyn tuńǵysh óndirýge tikeleı atsalysqandardyń qatarynda operatorlar Qapysh Qalıev, Uzaqbaı Ǵabdolov, Qojaǵalı Tájiǵulov, Sarbas Talasbaev, Marıa Túrına, Vladımır Pylan, Lúsá Pylan, mehanık Kárim Ótebaev, elektrli gazben pisirýshi N.Bataev, temir pisirýshi Valerıı Gorbatov, slesar B.Kozlov, sheber Sálim Meńdiǵazıev, t.b. boldy. Osy jyly ken alańynan 139 myń tonna munaı óndirilip, memleketke tapsyryldy.
Jetibaı munaıynyń óndirisin uıymdastyrýǵa atsalysqan alǵashqy býyn ókilderi: bas energetık Aımuhan Taýjanov, bas mehanık Gennadıı Ivanovıch Ponomarev, ken ornyn ıgerý sheberi Qadı Ótegenov, aýysym sheberi İzǵaraTalasbaev, uńǵylardy ıgerý sehynyń sheberi Saradın Raqymberdıev, áýeli sheber, artynan bólimshe bastyǵy, keıin úlken qoǵam qaıratkerine aınalǵan Saıyn Nádiruly Shapaǵatov, bólimshe bastyǵy Baqytjan Qazıev, ortalyq ınjenerlik-tehnologıalyq qyzmettiń bastyǵy Aleksandr Zaharovıch Iýrchenko, osy qyzmettiń aǵa ınjeneri Petr Sergeevıch Chesnakov, geolog Jaqsylyq Uzaqbaev, uńǵylardy ıgerý sehynyń bastyǵy Fedor Grıgorevıch Nagovısın, osy sehtyń aǵa mehanıgi Amantóre Sarmysov, qurylys ınjeneri Fatıma Batyqova, qurylys sheberi Qýantqan Sátimov, operator, sheber, óndiristik-tehnıkalyq bólimniń aǵa ınjenerleri Muratbaı Jaqsyǵatov, Maılash Esbergenov, uńǵylardy ıgerý sehynyń geology Amangeldi Tastyǵaraev, geolog Qýanysh Sısenbaev, uńǵylardy ıgerý sehynyń sheberi Boranbaı Álımuhanbetov, sheberler Sátjan (Shandybaı) Ótesinov, Bógembaı Qojyqov, Amangeldi Órbisinov, Kım Aqjigituly Kórpeshov, operatorlar Bátish Ótkilbaeva, J.Qaraqonaqov, t.b. edi.
1969 jyly Jetibaı ken ornynan óndirilgen munaıdyń kólemi 1 mıllıon, al 1970 jyly 1 mıllıon 500 myń tonnaǵa jetti. Osy jyly «Jetybaıneft» munaı kásipshiligi basqarmasynyń ataýy Jetibaı munaı-gaz óndirý basqarmasy bolyp ózgertildi. Basqarma bastyǵy bolyp Keńes Dúısenǵalıuly Jolamanov taǵaıyndaldy.
1971 jyly Jetibaı ken ornynan 5 mıllıon tonna munaı óndirildi. 1972 jyly Jetibaı munaı-gaz óndirý basqarmasynda táýligine 10 myń tonna munaı óndirý asýy alyndy.
Sol jyldary Jetibaıda eńbek jolyn bastap, keıin Qazaqstan munaı salasynyń damýyna úlken úles qosqan maıtalman mamandardyń qatarynda Nurlan Balǵymbaev, Lázzat Qıynov, Tólegen Hasanov, Uzaqbaı Qutjanov, Sısenǵalı Óteǵalıev, Saǵıdolla Bıjanov, Baqtygereı Serikbaev, Jeńis Jalǵasov, Tilektes İztileýov, Tańbaı Alpysbaev, Qýanbaı Jarylǵasov, Sálimjan Ábishev, t.b. boldy. Keıin, 1980-shi jyldary óndiriske Tımýr Mustahıuly Bımaǵambetov, Alık Serikuly Aıdarbaev, Jetibaı Qýanaıuly Tóleǵojaev, Abat Aqmuqanuly Nurseıitov sıaqty jas mamandardyń jańa tolqyny keldi. Bulardyń bári de keıin Qazaqstan munaı ónerkásibiniń iri basshylary boldy.
1982 jyly Jetibaı ken ornynan kásiporyn qurylǵannan bergi ýaqyt ishinde 40 mıllıonynshy tonna, al1988 jyly 50 mıllıonynshy tonna munaı óndirildi.
1990-jyldary Jetibaı munaı-gaz óndirisine jergilikti kadrlardyń úshinshi jańa tolqyny kelip qosyldy. Olardyń ishinde birqatary bú­ginde óndiris basshylary  deńgeıine deıin kóte­rilgen T.Kóshkinbaev, J.Tegisbaev, N.Isabaı, S.Tastyǵaraev, Q.Jaqsyǵatov, B.Jańabaı, A.Júz­baev, S.Temirhanov, t.b. bar.
«Jetybaıneft» munaı kásipshiligi basqarma­sy­nyń alǵashqy bastyǵy Saǵıdolla Nurjanovtan bastap bul basqarmaǵa ár jyldary Aleksandr Dergachev, Keńes Jolamanov, Murat Salamatov, Dmıtrıı Gorúnov, Ánes Búrkitbaev, Tabyn Orjanov, Maqsat Borambaev, Jaqsylyq Janǵazıev, Ospan Eńsegenov, Maksım Sabýǵalıev, Hojalepes Eleýsinov, Abaı Kývanov, Baqyt Imanbaev, Saǵıdolla Bıjanov, Bolat Seıitmaǵanbetov, t.b. basshylyq etti. Basqarmanyń qazirgi bastyǵy – Joldasbek Eshmanov. Bul azamattardyń ishinde óziniń aıryqsha qasıetterimen daralanǵan Baqyt Altaıuly Imanbaev búginde «Mańǵystaýmunaıgaz» aksıonerlik qoǵamynyń bas dırektory bolyp, alyp kásiporyndy basqaryp otyr.
Eńbek maıdanynda erekshe kózge túsken Haırolla Ihsanǵalıev, Raısa Moldabaeva,  Boranbaı Álımuhanbetov, Baıazı Qaramurzıev, Jaıman Taspaev, Balıash Elbaeva, Pavel Avgarovıch Dzagoev, Tańbaı Alpysbaev, Iosıf Ermolıskıı, Tóleǵus Qulshabaev, Senbiǵalı Mataev, Amanqos Taıpaqov, Ybyraı Quttybaev, Qonaqbaı Kúzekenov, Murat Jumaev, Jarylǵas Nurǵalıev, Berdeken Eshın, Tatána Tkachenko, Qalymbaı Ótebaev, Sholpan Jubanıazova, Jumahan Alagózov sıaqty eńbek ozattary kásiporynnyń dańqyn shyǵaryp, ataǵyn aspandatty.
Jetibaı munaıyn ıgerýde uzaq jyldar boıy eńbek etip, ter tókken munaıshylardyń qatarynda keıbiri ómiriniń sońyna deıin, kópshiligi qurmetti eńbek demalysyna shyqqanǵa deıin jumys jasaǵan óndiris basshylary J.S.Uzaqbaev, M.Jaqsyǵatov, U.N.Qutjanov, operatorlar O.Balmurzıev, J.Baı­jaýynova,  S.Nurhasanova, T.Mekenova, Ú.Úlmám­betova, Q.Sarqulov, T.Botaǵaraev, otpen pisirýshi M.B.Dáýletov, elektrık A.Tanaýov, B.Ótkelbaeva, A.D.Zaharovtardyń attary atalady. Olardyń sońyn ala 1970-jyldary óndiriske kelgen operatorlar S.Qýantqanov, Q.Omarova, N.K.Býlatova, t.b. ken ornynyń ıgerilýine úlken úles qosty.
Búgingi tańda Jetibaı munaı-gaz óndirý basqarmasynda 2200-deı adam jumys isteıdi. Birligi jarasqan tatý ujym, bilikti mamandar men óz isiniń sheberleri, kásibı qyzmetkerler eńbek etetin basqarma ujymy munaı óndirý kólemin jyldan-jylǵa arttyryp keledi.
– Reti kelgende aıta ketý kerek, osyndaı dańqty ken oryndary bar «Mańǵystaý­munaıgaz» aksıonerlik qoǵamy osy ólkeniń damýy men kemel keleshegi úshin qolynan kelgenin aıanyp qalǵan emes. Kompanıa Elbasymyzdyń júrgizip otyrǵan sara saıasaty Mańǵystaý oblysynda júıeli túrde júzege asýyna barynsha qoldaý kórsetip keledi. Ótken 2015 jyly bul baǵytta qyrýar ıgilikti ister tyndyryldy, – dedi  bizben áńgime barysynda «Mańǵystaýmunaıgaz» AQ bas dırektory Baqyt Imanbaev. – Atap aıtqanda, Mańǵystaý oblysyna jáne Aqtaý qalasyna áleýmettik qoldaý kórsetý úshin 300 mln teńge qarjylaı bólinse, onyń ishinde oblys boıynsha mańyzdy joba – «Mańǵystaýdyń damýyna úles: tikeleı sheteldik ınvestısıalardy qarqyndatý jáne esep berý arqyly qol jetkizýdi jaqsartý» áleýmettik jobasyna 172 mln teńge bólindi. Jalpy, sońǵy bes jylda «Mańǵystaýmunaıgaz» aksıonerlik qoǵamy tarapynan óńirdiń áleýmettik-ekonomıkalyq damýyna 8 mlrd 245 mln teńgeden astam qarjy bólingenin atap aıtýymyz kerek.
Kompanıa qarajatynyń esebinen óńirde qan­shama mektepter men sport alańdary, mádenı-áleý­mettik nysandar, jańa joldar salyndy, tarıhı eskertkishterdi jóndeý jumystary júrgizildi.
Aksıonerlik qoǵam oblystyń eldi mekenderin qoldaý maqsatynda demeýshilik kórsetý jumys­taryn jyl saıyn jalǵastyryp keledi. Atap aıtqan­da, Mańǵystaý jáne Qaraqıa aýdandaryna ótken jyly 78 mln teńge qarjylaı kómek kórsetildi.
Áleýmettik jaýapkershilik kompanıanyń da­mýyn­daǵy mańyzdy strategıalyq baǵyttardyń biri bolyp tabylady. Bul rette biz 2015 jyly qa­zaq­standyq taýarlardy, jumystardy jáne qyz­metterdi satyp alýdy tıisinshe 35, 70 jáne 90 paıyz kóleminde qamtydyq.
Kásiporyn árqashanda jergilikti taýar óndirý­shilerdiń ónimderi men qyzmetin damytýǵa qoldaý tanytyp otyrady. Osy maqsatta ótken jyly jer­gilikti aýyl sharýashylyq óndirýshilerimen 547 mln  teńge somasyndaǵy memorandýmǵa qol qoıdyq. Osylaısha kompanıa jumysshylary tutynatyn et jáne sút ónimderi tek qana mańǵystaýlyq fermerlerden satyp alynyp keledi.
«Mańǵystaýmunaıgaz» aksıonerlik qoǵamynyń basshylyǵy ólkedegi týrızm men sporttyń damýyna da zor úles qosyp keledi. Kompanıa «Mań­ǵystaý oblysynyń boks federasıasy» qo­ǵam­dyq birlestigine jarystardy ótkizý jáne jas sport­shylardyń ártúrli respýblıkalyq jarys­tarǵa qa­tysýy úshin 60 mln teńge qarjy bóldi.
Bilimdi maman, bilikti kadr, jalpy, adam resýrsy – kompanıanyń basty baılyǵy bolyp tabylady. Kásiporyn basshylyǵy bul gýmanısik baǵy­tynan eshqashanda aınyǵan emes. Sol sebepti 2015 jylǵa jumysshy-qyzmetkerlerdiń balalaryn oqytý úshin 53 mln 500 myń teńge qarajat bólindi. Sonymen birge jumysshy-qyzmet­ker­lerdiń de mindetti oqýyn, mamandardyń bilik­tiligin arttyrýyn, QHR-men ózara tájirıbe almasý sıaqty oqýlaryn da jiti qadaǵalap, arnaıy qarjylandyryp keledi.
Ujymdyq kelisimshart boıynsha 2015 jyly «Mań­ǵystaýmunaıgaz» AQ-nyń jumysshy-qyz­met­­­­kerlerine 243 mln teńge kóleminde mate­rıal­­dyq kómek berilse, sonyń 67 mln teńgesi zeı­net­­­kerliktegi qyzmetkerlerge járdem retinde jum­sal­dy. Uly Jeńistiń 70 jyldyǵy qarsańynda kóp­­tegen ardagerlerdiń úılerine kúrdeli jóndeýler jasaldy. Qoǵam jumysshylarynyń otbasynda sá­bı­li bolǵandaryna, tórt jáne odan da kóp balaly otbasylarǵa, múgedek bala tárbıelep otyrǵan jumysshy-qyzmetkerlerge, otbasynda jaqyn týy­­sy qaıtys bolǵandarǵa beriletin qarjylaı kó­­mekteri bar. Jaz mezgilinde jumysshy-qyzmet­ker­lerimizdiń otbasyndaǵy 1700-den astam bala Qa­zaq­stan men Reseıdiń jazǵy saýyqtyrý demalys oryn­darynda demalyp keldi. Sonymen qatar kompanıada jalaqy men toqsandyq syıaqylardyń tómendeýi, qyzmetkerlerdiń qysqartylýy bolǵan joq. Kúrdeli kezeńdegi daǵdarys qıyndyqtaryna qa­ra­mastan, biz Ujymdyq shart boıynsha moıny­myzǵa alǵan barlyq mindettemelerdi oryndap ke­lemiz.
Qazirgi tańda quramynda irili-usaqty 14 kenishi bar Jetibaı ken ornynyń áýel bastaǵy ıgeriletin munaı qory 166 413 myń tonna bolsa, kúni búginge deıin sonyń 90 900 myń tonnasy ıgerildi. Bul – 2016 jyldyń 1 qańtaryndaǵy málimet. Demek, áli de qara jerdiń qoınaýynda 75 513 myń tonna «qara altyn» qory bar degen sóz.
Ústimizdegi jyldyń alǵashqy jartyjyl­dyǵy­nyń qorytyndysy boıynsha óndirilýge tıisti 1 073 285 tonnanyń ornyna 1 089 463 tonna munaı óndirilip,  mejelengen jospar artyǵymen oryndaldy. Memleketke 1 085 729 tonna munaı tapsyryldy. Bul kórsetkish josparlanǵan 1 068 557 tonnadan 17 172 tonnaǵa artyq.
Qol jetken osynaý jetistikter men tolaǵaı tabystar – munaıshylardyń Táýelsiz Qazaqstan Respýblıkasynyń 25 jyldyq mereıli merekesi men «Jetibaımunaıgaz» óndiristik birlestiginiń  jarty ǵasyrlyq torqaly toıyna laıyqty tartýlarmen kelip otyrǵanynyń aıqyn aıǵaǵy. Aldaǵy ýaqytta da bul uıymshyl ujymnyń osyndaı as­qaraly asýlardy baǵyndyryp, bıik  belesterden kórine bererine kúmán joq.
Sóziniń sońynda Baqyt Altaıuly barsha mu­naı­­­shylar qaýymyn osynaý qos merekemen qut­tyq­tap, denderine saýlyq, otbasylaryna aman­dyq, eńbek­terine jemis tiledi.
Biz de kompanıa basshysyna qýanyshtaryńyz qutty bolsyn deı otyryp, árdaıym jasampaz eń­bektiń jarqyn úlgisin kórsetip, Táýelsiz Qazaq eli­niń týy bıik, tuǵyry myqty bolyp, qaryshtap da­mýy úshin qajyrly úlesterińizdi qosa berińizder demekpiz.

Rymtaı SAǴYNBEKOVA