Tarıhtyń tereńine ketip bara jatqan surapyl soǵystyń yzǵary áli kúnge deıin basylmaǵan sekildi. Soǵystyń bir ushqyny qazirgi qazaq qoǵamyn sharpyp tur. Soǵys jyldary qalyń qazaq qanmaıdanda oqqa ushsa, urpaqtary sol soǵysty eske túsirer georgıı lentasynyń daýyna shyrmalýda. Jeńis kúniniń belgisi bolyp sanalatyn georgıı lentasyn Reseı áskeri men ultshyldary Ýkraına qarsy sharalarynda taǵyp shyǵýy - bul lentaǵa basqynshyl sıpat berdi. Tipti, lentany orys ımperıalızminiń kórinisi dep baǵalady. Bul týraly saıtymyzdyń aldyńǵy shyǵarylymynda jazǵan bolatynbyz (http://qamshy.kz/?p=9944)Sondyqtan, georgıı lentasyn almastyratyn týymyz tústes, oıýmen kómkerilgen lenta paıda boldy. Áleýmettik jelilerde trendke aınalyp, merekelik tartý retinde keıbir qalalarda taratyldy. Osy baýdyń avtory jýrnalıs Aıdos Juqanulymen suhbattasýdyń sáti túsken edi...
- Sálemetsiz be? Ózgeniń qańsyǵyn tańsyq etpeı, ulttyq belginiń bolýy qýantarlyq jaıt eken. Sizge mundaı lenta jasaý týraly ıdeıa qalaı keldi?
- Namys qoı namys. Kınolardy kórip otyrsań jeńgen tek orystar sıaqty. "Za namı Moskva! Gde rýsskıe, tam pobeda" dep Georgıı lentasyn taǵyp alyp júrgenderi. Qazaqtan resmı derek boıynsha sol II dúnıejúzilik soǵysta 600 myń adam óldi ǵoı. Olardy nege qurmettemeımiz? Al sol georgıı lentasyn XVIII ǵasyrda Reseı patshasy "Orta Azıaǵa joryǵy úshin" degen medaldyń taspasy retinde alǵash ret paıda boldy. Sonda bizdiń ata-babamyzdy qyrǵandardy qyrylǵandardyń urpaǵy áspetteýi kerek pe?! Bul máńgúrtızm. Stokgolm sındromynan soraqy dúnıe. "Máńgúrt sındromy" degen tirkes engizetin ýaqyt keldi. Qysqasy óz-ózińdi jattaı syıla, jat janynan túńiler degendi umytpaǵanymyz jón. Sondyqtan oılap taptym. Dostaryma kórsettim. Birinshi bolyp aqyl qosqan Baqyt Muhtar degen jigit. Sodan keıin dostarym Qasym Amanjol men Muhtar Taıjan qoldady. Astana ákimdigi mata etip shyǵarypty.Olarǵa rızamyn. Keıin 31-mamyrǵa arnap bárimiz birigip, qara jáne kók jolaqty aza baý nemese qaraly taspany da oılap shyǵardyq. Al ony mata retinde shyǵarýǵa Muhtar demeýshi boldy. Byltyr tarattyq. Bıyl Almaty bolmasa da, Astana ákimdigi qoldaıtyn shyǵar. Byltyr OQO ákimdiginen Berik Ýálı qoldaǵan-dy.
