Jaqynda meshitterde resmı ýaǵyzdan keıin qosymsha onyń orys tilindegi túsiniktemesin berý usynylǵan bolatyn. Bul másele tóńireginde qazir qoǵamda qyzý pikirtalas júrip jatyr. Bireýler bul durys bastama dese, endi bireýler munyń qazaq tiline kesiri tıedi dep alańdaıdy. Bul saýalǵa májilis depýttary Baq.kz saıtynyń tilshisine jaýap berdi, - dep habarlaıdy Qamshy.kz.
Májilis depýtaty Bekbolat Tileýhan máseleniń eki jaǵy bar ekenin aıtady. Sondyqtan jaı-japsardy jan-jaqty zerdelegen jón.
«Bul endi kelgen jamaǵatqa baılanysty. Mysaly, Soltústik Qazaqstanda jamaǵat jappaı orys tildi bolyp, qutpa qazaqsha oqylyp, ony el túsinbese, qalaı bolady degen oı bar. Ekinshiden, qazaqtyń uǵymynda dinı-joralǵylardyń barlyǵy tek qana ultymyzǵa ǵana qatysty sıaqty. Jeke ózime onyń oryssha aıtylýy qulaqqa túrpideı tıedi. Muny da túsinýge bolady. Endi aqıqat shamamen ekeýiniń arasynda dep oılaımyn», - deıdi depýtat.
Nurtaı Sabılánovtyń sózinshe, meshitke baratyn jamaǵattyń barshasy derlik qazaq tilindegi ýaǵyzdy túsinedi. «Al túsinbeıtin azshylyqtyń tildi úırengeni jón bolar» degen pikirde depýtat.
«Bireý túsinbeıdi eken» dep jatsa, onda keletin adamdar qazaqsha úırený kerek dep esepteımin. Meshitterge ózimizdiń qazaq azamattary barady. Meshitke baryp júrgen azamattardyń 98 paıyzy qazaq tilinde jaqsy túsinip, jaqsy qabyldaıdy. Múmkin keı jerlerde qazaq tilindegi ýaǵyzdy túsinbeıtindeı jaǵdaı bar shyǵar. Ony qoǵam ózi retteýi kerek. Eń bastysy, durys ýaǵyz aıtyp, sony jetkizý. Áıtpese, qoǵamymyzda ár túrli ýaǵyz aıtatyn adamdar bar. Mańyzdysy, qaı tilde aıtqanda emes, halyqqa jaqyn jetkize bilýde bolyp otyr. Jaqsy ýaǵyz aıtatyn azamat bolsa, adamdar ony qaı tilde bolsa da tyńdaıdy, túsinedi», - deıdi N.Sabılánov.
Májilis depýtaty Ahmet Muradov qajettilik bolǵan jaǵdaıda, ýaǵyzdy oryssha da aıtýǵa bolady dep esepteıdi.
«Árıne, kóp jamaǵat bolǵan jerde, ýaǵyz qazaqsha oqylýy kerek. Biraq túrli ult ókilderi keletin meshitter bar. Olar ýaǵyz tyńdap, túsingisi keledi. Osy adamdarǵa ýaǵyzdy oryssha túsindirip ketkende turǵan eshteńe joq dep oılaımyn. Mámelen, Almatyda «Vaınah» meshiti bar, onda ýaǵyz qazaqsha, oryssha jáne sheshen tilinde oqylady. Árkimge Jaratqannyń sózin jetkizýge tyrysady», - degen pikirin bildirdi ol.
Qazaqstan Jazýshylar odaǵynyń tóraǵasy, Senattyń burynǵy depýtaty Nurlan Orazalınniń paıymdaýynsha, meshitte qazaqsha ýaǵyz oqylǵan soń, qosymsha onyń orys tilinde túsiniktemesin berýdiń esh ábestigi joq.
«Oryssha sóıleıtin musylmandar bar ǵoı. Onyń zıany joq dep oılaımyn. Dinde til emes, dinde uǵym, senim, nanym degen bolý kerek. Oryssha nasıhattaý tıimdi bolsa, onyń eshqandaı zıany joq. Tek dinge, qoǵamǵa qarsy bolmaý kerek, ondaı jaǵdaıda toqtatý qajet. Qazaq eliniń tutastyǵyna qarsy bolmaýy tıis», - deıdi senator.
Aıta ketsek, ımamdardyń ýaǵyzyn tolyq túsinbeıtin dindarlar bar bolǵandyqtan, kópultty eldi mekenderdegi jekelegen meshitterde qosymsha orys tilinde túsinikteme berý usynylyp otyr. QR Din isteri jáne azamattyq qoǵam mınıstrliginiń ýáji boıynsha qazaqsha ýaǵyzdy túsinbegen azamattar ıslam týraly aqparatty resmı emes derekkózderden, onyń ishinde teris dinı aǵym ustanýshylarynan alýǵa májbúr. Endi Qazaqstan musylmandary dinı basqarmasy meshitke kelýshi jamaǵattyń pikirin eskere otyryp, osy másele boıynsha sheshim qabyldaıtyn bolady.
