Búgin Qazaqstan men Reseı yntymaqtastyǵynyń XIII óńiraralyq forýmy aıasynda «Bıznestiń qajettiligin tıimdi qamtamasyz etý konteksindegi Qazaqstan men Reseıdiń kólik-logıstıkalyq kesheniniń damýy» taqyrybynda paneldik sesıa ótti, - dep habarlaıdy Qamshy.kz QazAqparatqa silteme jasap.

Shara barysynda Qazaqstan men Reseı arasyndaǵy yntymaqtastyqtyń avtomobıl, temir jol, teńiz jáne áýe kólikteri, sonymen qatar, Qazaqstan Respýblıkasy men Reseı Federasıasy arasyndaǵy avtomobıl joldaryn damytý sıaqty negizgi máseleler talqylandy.

Jıynda QR Investısıalar jáne damý vıse-mınıstri Berik Kamalıev Qazaqstannyń temir joly men avtomobıl joldarynyń Reseıdiń iri shekaralyq aımaqtaryna shyǵýy qamtamasyz etilgendigin atap ótti. Olar Qazaqstan men Reseı arqyly Qytaıdan Eýropalyq odaq elderi men Parsy shyǵanaǵyna  shyǵatyn jolaýshylar men júk tasymalynyń artýyna múmkindik týǵyzatyn halyqaralyq kólik dálizi sanalady.   

Otyrys qorytyndysynda «QazAvtoJol» UK» AQ, «Reseı avtomobıl joldary» memlekettik kompanıasy men «RT-Invest kólik júıesi» jaýapkershiligi shekteýli qoǵamy arasynda ózara túsinistik jáne yntymaqtastyq memorandýmyna qol qoıyldy.

Aıta keterligi, búgingi tańda eki el arasynda kúndelikti 20 áýe reısi qatynaıdy. Qazaqstan men Reseı arasynda 29 ushý baǵyty qamtylǵan.