Astanada turatyn kálkýlátor bala reseılik teleshoýdyń qazylar alqasy men kórermenderin tań qaldyrdy. 10 jastaǵy oqýshy matematıkalyq esepterdi shemishkeshe shaǵady,- dep habarlaıdy Qamshy.kz Baq.kz-ke silteme jasap.
«Rossıa 1» arnasynyń «Ýdıvıtelnye lúdı» jobasynda İlıas úsh synaqtan da súrinbeı ótken: aldymen ol birneshe sekýndta eki jáne úsh tańbaly sandy qosyp, keıin eki qos tańbaly sannyń kvadratyn taýyp. artynsha osy sandardyń aıyrmasyn eseptep berdi. Balanyń tapqyrlyǵyna rıza bolǵan kórermender oryndarynan óre túregelip, qol shapalaqtady. Atalǵan shoýdyń jazbasy Youtube hostınginde jarıalandy.
10 jastaǵy İlıas Toqtarhandy «kálkýlátor adam» dep ataıtyn kórinedi.
«Meni kálkýlátor adam dep ataıdy, óıtkeni men oısha barlyǵynan jaqsy esepteımin. Men eki, úsh, tórt tańbaly sandardyń birneshe qataryn esepteı alamyn, eki jáne úsh tańbaly sandardy kóbeıtip, bólip, kvadrat túbirin shyǵaramyn. Matematıkalyq ıkemim men kileń beske oqıtynyma maqtanamyn», - dedi ol telejoba kezinde.
«Men jaı ǵana esepter men abakýsty elestetip, esepti sheshemin», - dep túsindirdi oqýshy óziniń erekshe qabiletin.
Onyń aıtýynsha, 9 jasynda ol Nú-Delıde mental arıfmetıkadan ótken jarysta top jarǵan. Dodaǵa álemniń 52 elinen 12 myń adam qatysqan.
«Meniń bul qabiletim dúkenge barǵanda, shetelge shyqqan kezde kóp kómektesedi. Valúta baǵamyn kálkýlátorsyz-aq esepteı beremin. Bolashaqta IT mamany bolǵym keledi. 3D-oıyndarynyń baǵdarlamasyn, robottar men saıttar jasap, fotoshopty meńgergim keledi. Maǵan bul joba matematıkalyq qabiletimdi kórsetip, barlyǵyn tańdandyrý úshin kerek», - deıdi İlıas Toqtarhan.
«Ýdıvıtelnye lúdı» teleshoýy – 2011 jyly Germanıada sátti bastaý alyp, Qytaı, AQSH, Fransıa, Italıa men Ispanıany qosa alǵanda kóptegen elderde taralǵan he Brain shoýynyń reseılik nusqasy.
