Ólshem birligin qamtamasyz etý salasyndaǵy zańdylyqtardy buzý oqıǵalary Almaty oblysynda áli de baıqalady, - dep habarlaıdy Qamshy.kz.

QR «Ólshem birligin qamtamasyz etý týraly» Zańynyń talaptary kóbine medısınalyq jáne bilim berý mekemelerinde buzylyp, ólshem quraldary tekserissiz qoldanylady. Bul jóninde Almaty oblysynyń óńirlik komýnıkasıalar qyzmetinde ótken brıfıńte Tehnıkalyq retteý jáne metrologıa komıtetiniń Almaty oblysy boıynsha departamenti basshysynyń mindetin atqarýshy Ábjaparuly Ákimov málimdedi.

"Memlekettik metrologıalyq baqylaý uıymdastyrý jáne júrgizý sheńberinde 2016 jyldyń 9 aıy ishinde 97 tekseris júrgizilip, 48 zań búzýshylyq anyqtaldy. Osy ýaqyt aralyǵynda zańdy tulǵalar 11 304 930 teńge kóleminde ákimshilik jaýapkershilikke tartylǵan", - dedi Á. Ákimov.

Sondaı-aq, QR Memlekettik rámizderin ornatý jáne qoldaný qaǵıdalary boıynsha atalǵan departament oblystyń 11 aýdanynda túsindirý jumystaryn júrgizgen. «Qazaqstan Respýblıkasynyń Memlekettik Eltańbasy. Tehnıkalyq talaptary» atty №989-2014 QR ST Ulttyq standartyna ózgerister engizilip, Qazaqstan Respýblıkasynyń Memlekettik Eltańbasyn óndirýdi jaqsartýǵa kóp múmkinshilik beredi. Máselen, Qazaqstan Respýblıkasynyń Memlekettik Eltańbasynyń túsiniń talaptaryna ózgerister endi. Konstrýktorlyq syzbalary qaıtadan qarastyryldy. Sonymen qatar, Memlekettik Eltańbany sapaly óndirý maqsatynda úsh jyldyq kepildik merzim engizilgen.

Almaty oblysynyń

óńirlik komýnıkasıalar qyzmeti.