Aqtóbe oblysynda meshitterdegi bas ımamdar men naıb ımamdar jappaı jumystan shyǵarylyp jatyr. Búginniń ózinde oblysta eki birdeı aýdan meshitteriniń bas ımamdary aýysyp úlgerdi. Oryndaryna saýaty joǵary, bilikti dinı qyzmetkerdi Almatydan aldyrtypty. Qazaqstan musylmandar dinı basqarmasynyń apparat basshysynyń aıtýynsha, oblysta áli 7 ımam ornyn bosatady, - dep habarlaıdy Qamshy.kz 31-arnaǵa silteme jasap.
JANAR QOJANOVA, tilshi:
- Búgin Aqtóbe oblysynda eki birdeı aýdan meshitiniń bas ımamy men naıb ımamy aýysty. Onyń biri Temir aýdanyna qarasty Shubarqudyq aýylyndaǵy meshit bolsa, ekinshisi Qandyaǵash qalasyndaǵy meshit. Bul eki aýdan da qazirgi tańda radıkaldy aǵymdar beleń alǵan, dinı ahýal ýshyǵyp turǵan aımaq sanalady.
Jergilikti ımamdardyń ornyn Almatydan kelgen din ókilderi almastyrdy. Aqtóbedegi dinı ahýalǵa baılanysty jumys toby músheleriniń aıtýynsha, olar 10 kúnnen beri oblystaǵy barlyq ımamdardy attestasıalaýdan ótkizip, dinı saýattylyǵyn teksergen.
ǴILYMBEK MÁJIEV, Qazaqstan musylmandary dinı basqarmasynyń apparat basshysy:
- -Bul eń aldymen sapaly mamannyń kelýi bul kóp jaǵdaıdy ózgertedi. Sebebi sapaly kadr, bilimdi maman ol halyq úshin, el úshin, jamaǵat úshin, jalpy qoǵam talabyna saı bolý úshin ol kóp nárseni ózgertedi. Bizdiń kútetin úmitimiz óte joǵary.
Ǵılymbek Májıevtiń ózi de Aqtóbege Shubarshy men Keńqıaqtaǵy oqıǵalardan soń kelgen. Sondyqtan, Aqtóbedegi ımamdardyń jıi aýysyp otyratynyn turǵyndar da jaqsy biledi. Olar da qazirgi ımamdardyń bilim sapalary tómen degen pikirdi quptaıdy.
NURǴALI NURALY, turǵyn:
- Qazirgi ımamdardyń bilimi nasharlaý. Bolmasa nege ol úsh aıda bir almasady? Tórt aıda bir almasady. Keshegi Jambyldan kelgen Nurǵasyr meshitiniń ımamy osymen ekinshi ret almasyp otyr.
Aqtóbe oblysy jalpy elimiz boıynsha radıakaldy aǵymdar keń taraǵan aımaqtardyń biri. Oǵan dálel, Aqtóbede dinı ekstremıstik jaǵdaılardyń jıi bolýy. Sońǵy 5 jyldaǵy aımaqta bolǵan teraktardy esterińizge salsaq: 2011 jyly 25 jastaǵy azamat Ulttyq Qaýipsizdik komıtetiniń ǵımaratynda ózin jaryp jibergen bolatyn. Odan keıin 2012 jyly Shubarshı aýylynda radıakaldy aǵymdaǵylar polıseılerden kek alý úshin shabýyl jasady. Arada 4 jyl ótip, 2016 jyldyń 5 maýsymynda terakt Aqtóbede taǵy qaıtalandy. Dinı ahýaly jaqsarmaı turǵan Aqtóbe oblysyn endi arnaıy kelgen jumys toby ábden zerttemek.
