«Nur Otan» partıasy tóraǵasynyń birinshi orynbasary Muhtar Qul-Muhammed, densaýlyq jáne áleýmettik damý mınıstri Tamara Dúısenova men bilim jáne ǵylym mınıstri Erlan Saǵadıev ózara áriptestik týraly memorandýmǵa qol qoıdy, - dep habarlaıdy Qamshy.kz.

Memorandým aıasynda joǵary oqý oryndaryna túspegen, UBT tapsyrmaǵan mektep túlekterine qoldaý jasalmaq.

Bıyl Qazaqstanda 122 myń bala mektep bitirgen. Olardyń 70 myńǵa jýyǵy UBT-ny sátti tapsyrsa, 37 myńnan astamy testileýge qatyspaǵan. Qalǵan 14 myńy synaqtan ótpeı qalǵan. Osy JOO-ǵa túse almaı qalǵan jastardy jumyspen qamtý týraly tapsyrmany 9 qyrkúıek kúngi Úkimettiń keńeıtilgen jıynynda Elbasynyń ózi qoıǵan bolatyn.

«Biz oryndaýǵa kirisken Prezıdent tapsyrmasy birden birneshe mańyzdy máseleni sheshedi. Birinshiden, eń bastysy biz jastarǵa jumys tabýǵa, óz betinshe ómir súrýine múmkindik týǵyzamyz. Ekinshiden, osy arqyly biz «Nurly jol» baǵdarlamasy aıasynda jańa jobalarǵa jumys kúshin sheshemiz. Úshinshiden, jastardy túrli kúmándi uıymdardan qorǵaımyz. Bul aýqymdy da mańyzdy is»,-deıdi M. Qul-Muhammed.