Maqtaraldyq dıqandar alajazdaı eńbeginiń jemisin kóre bastady. Ásirese, ondaǵy qaýyn men qarbyz ekken aǵaıyn ónimderin qyr asyryp, Qazaqstannyń barlyq óńirlerimen qatar, Reseı men Belorýs naryǵyna da shyǵaryp úlgerdi. Osy kúnge deıin 56 myń tonna qarbyz, 17,5 myń tonna qaýyn satylymǵa túsken,- dep habarlaıdy OQO ákimdiginiń baspasóz qyzmeti.

Dıqandardyń aıtýynsha, Resede qaýynǵa degen suranystyń áserinen ótken jylmen salystyrǵanda baǵa turaqty, kóńil kónshiterlik. Jeke kásipkerler jergilikti qaýyn men qarbyzdy qabyldaıtyn núktelerde qaýynnyń 1 kelisin 100 teńgeden, al qarbyzdy 25 teńgeden satyp alýda. Qaýyn men qarbyz artylǵan júk kólikteriniń basym kópshiligi kórshi memlekettiń Máskeý, Sankt-Peterbýrg, Samara qalalaryna eksporttalyp jatqandyǵy, osy qalalardaǵy suranystyń joǵary ekendigin kórsetip otyr. Ásirese egilgen qaýynnyń alýan túrli sorttarynyń ishinde dıqandar arasynda «Valet» atymen atalyp ketken túri erekshe suranysqa ıe kórinedi.

Qazaqstan naryǵy men sheteldiń bazar sórelerine shyqqan aýyl sharýashylyq ónimderi bul ǵana emes. Jemis-jıdek pisip, ónimin bere bastaǵaly maqtaraldyq sharýalar 75 tonna qyryqqabat, 500 tonna pıaz, 93 tonna sábiz, 235 tonna asqanalyq qyzylsha, 182 tonna bolgar buryshy, 2 myń tonna qyzanaq pen 1700 tonnadan astam qıar shyǵaryp, saýdalady.

Qosymsha aqpar retinde bile júrińiz. Búginde aýdandaǵy egistik alqapta 277 ga jerde bıdaı, 20 ga-da arpa, 3416 ga-da jańa jońyshqa, 83481 ga jerde maqta, 5538 ga-da túrli kókónister, 23615,4 ga jerde baqsha, 753 ga jerde kartop, 10358,8 ga jerde dándik júgeri, 487 ga jerde kúnbaǵys, 2094,5 ga-da kúrish, 158 ga jerde súrlemdik júgeri, 140 ga jerde mash, 32 ga jerde fasol, 8 ga jerde soıa, 28,6 ga jerde jańa jemis-jıdek, 58,6 ga jerde jańa júzim egilip, jaıqalýda.