Shardarada 1 myń gektardan astam egistik alqaby qaıta aınalymǵa qosylmaq, dep habarlaıdy OQO ákimdiginiń baspasóz qyzmeti.

Atap aıtar bolsaq, Q.Turysbekov, Qosseıit, Kóksý aýyldyq okrýgterinde jalpy uzyndyǵy 94,4 shaqyrym kanaldy jóndeýden ótkizý josparlanyp, búginge deıin onyń 76,9 shaqyrymy qaıta qalpyna keltirildi. Sonymen qatar, 110 dana aǵyn sý tospalarynyń 61-i jańartyldy.

Búgingi tańda ondaǵy Qosseıit aýylyndaǵy «1-R-2» kanalynda 2 ekskovator men 1 búldozer, Kóksý aýyldyq okrýgindegi «2-R-1» jáne «2-R-2» kanaldarynda 3 ekskovator, Q.Turysbekov aýyldyq okrýgindegi «RK-1» jáne «RK-2» kanaldarynda 2 ekskovator men 1 «MTZ-80» traktor tehnıkalary ýaqytpen sanaspaı jumys isteýde. Al memleket tarapynan bólingen 151 mln. teńgege 4 merdiger kompanıa jóndeý jumystaryn júrgizip keledi. 
Jumystardyń barysyn aýdan ákimi A.Abdýllaev udaıy qadaǵalap, aýyldyq okrýgterdegi aǵyn sý nysandarynyń jóndeý jumysyna aıryqsha kóńil bólýde. Tıisti sala mamandaryna jumystyń sapaly jáne kestege sáıkes atqarylýyn qatań túrde qadaǵalap otyrý tapsyryldy. 
Dıqandar ıgiligi úshin jasalynyp jatqan mehanıkalyq jóndeý jumystary shilde men qazan aılary aralyǵynda tolyqtaı júrgizilip, bitedi. Osynyń nátıjesinde, Shardara aýdanyndaǵy 1112 gektar egistik alqap qaıta aınalymǵa qosylmaq.