Túrkistan aýmaǵynda jylqy sharýashylyǵyn damytý arqyly tómen paıyzdy nesıe berý boıynsha isker azamattardy qarjylaı qoldap, eldiń áleýmetin jaqsartýdy maqsat tutqan «Qulan» memlekettik baǵdarlamasyn júzege asyrýda «Qazagronesıe korporasıasy» aksıonerlik qoǵamymen qatar «Túrkistan nesıe seriktestigi» jaýapkershiligi shekteýli seriktestigi de belsendi áreket etip keledi. Túrkistan qalalyq ákimdiginiń mal sharýashylyǵy boıynsha memlekettik baǵdarlamalardyń oryndalýy týraly málimetterine súıensek, atalǵan qarjy ınstıtýttarynyń nesıelendirýlerimen munda jyl basynan bergi jeti aıda jalpy jıyntyǵy 40 mıllıon 600 myń teńgege tórt joba qarjylandyrylǵan. Oǵan 142 jylqy satyp alynǵan. Onyń segizi – aıǵyr.
Jylqy malyn asyldandyrý boıynsha jeńildikpen nesıe qarjy berý arqyly halyqty jumyspen qamtýdy kózdeıtin «Qulan» baǵdarlamasyna qatysýshylarǵa «Kazagronesıe korporasıasy» men «Túrkistan nesıe seriktestigi» jeti jylǵa deıin 7 paıyzben nesıe beredi. Kásipkerlerge qarjylaı qaryzǵa qol jetkizgennen keıingi alǵashqy eki jylynda jeńildik qarastyrylady. Nesıe qarjyny óteýdi kelisim boıynsha otyz kún saıyn emes, úsh aıda, jarty jylda, tipti on eki aıdyń qorytyndysynda bir-aq ret óteýge bolady. Eki jyl jeńildikpen berilgen jaǵdaıda syıaqy aı saıyn tólenedi. Al negizgi qaryzdy úshinshi jyldan bastap óteýge bolady.
«Qulan» baǵdarlamasy boıynsha on bes bas jylqy analyǵyna (bıege) bir bas asyl tuqymdy aıǵyr satyp alynýy tıis. Satyp alynǵan asyl tuqymdy jylqynyń árbir basyna qyryq myń teńgeden sýbsıdıa beriledi.
