Túrkistan qalasynda asyl tuqymdy iri qara mal sanyn kóbeıtip, et esportyn eseleýge baǵyttalǵan «Sybaǵa» memlekettik baǵdarlamasy aıasynda «Qazagronesıe korporasıasy» aksıonerlik qoǵamy jáne «Túrkistan nesıe seriktestigi», «Iassy nesıe seiktestigi» jaýapkershiligi shekteýli seriktestikteri mal sharýashylyǵy salasyndaǵy kásipkerlerge qarjylaı qoldaý kórsetip keledi. Túrkistan qalalyq ákimdigi taratqan mal sharýashylyǵy boıynsha memlekettik baǵdarlamalardyń oryndalýy týraly málimetke súıensek, atalǵan qarjy ınstıtýttarynyń nesıelendirýlerimen munda jyl basynan bergi jeti aıda jalpy jıyntyǵy 279 mıllıon teńgege jıyrma úsh joba júzege asyrylǵan. Nátıjesinde 1491 iri qara maldyń analyǵy satyp alynypty. Sonymen qatar, 79 buqa Túrkistan aýmaǵyna jetkizilgen.
Ata keteıik, «Qazagronesıe korporasıasy» aksıonerlik qoǵamy 8,5 mıllıon teńgeden joǵary, «Túrkistan nesıe seriktestigi» JSHS-i bır mıllıon teńgeden bastap jeti jylǵa deıin 7 paıyzben aqshalaı nesıe beredi. Qarastyrylǵan qarjylaı qaryzdardy kásipkerler eki jyl jeńildikpen paıdalana alady. Nesıe qarjyny óteýdi kelisim boıynsha otyz kún saıyn emes, úsh aıda, jarty jylda, tipti on eki aıdyń qorytyndysynda bir-aq ret óteýge bolady. Eki jyl jeńildikpen berilgen jaǵdaıda syıaqy aı saıyn tólenedi. Al negizgi qaryzdy úshinshi jyldan bastap óteýge bolady. Sharýalarǵa osyndaı keń múkindik syılaǵan «Sybaǵa» baǵdarlamasy halyqty jumyspen qamtýda, asyl tuqymdy mal basyn arttyrýda nátıjeli áserin tıgizip jatqany sózsiz.
