Myrzashóldik sharýalar maqta qyrmanyn «aq altynǵa» toltyryp jatyr. Aq maqtany qyrkúıek aıynan bastap tere bastaǵan qojalyqtar búginge deıin 53 myń gektar maqtalyqtan 110 myń tonna shıtti maqta jınap úlgerdi. Onyń 44 myń tonnaǵa jýyǵy qolmen terilse, 66 myń tonnadan astamy arnaıy tehnıkamen jınalǵan,-dep habarlaıdy Maqtaral aýdany ákiminiń baspasóz qyzmeti.
Túsimdilik te kóńil kónshitedi. Ár gektardan boljamdyq shamamen 24,1 sentnerden «aq altyn» alynýda. Búginge deıin jalpy maqtalyq alqaptarynyń 64 paıyzyn jınaǵan maqtashylar birinshi terimdi aıaqtap, ekinshi terimge kóshýde. Ol úshin aýdan kóleminde 297 dana túrli kombaındar men 10 myńnan astam adam maqta terim naýqanyna qatysýda.
«Maqtanyń baǵasy bıyl jaman emes. Kelisin 155-160 teńgeden ótkizip jatyrmyz. Ónimdiligi de jyldaǵydan aıtarlyqtaı joǵary. Qudaıǵa shúkir, bıyl bir baıyp qalatyn boldyq», - deıdi sharýa Aldan Sársenbaev.
Aıta keteıik, bıyl maqtaraldyq sharýalar maqta alqaptarynyń kólemin jyldaǵymen salystyrǵanda 6 myń gektarǵa arttyryp, 83 myń gektar jerge maqta shıtin ekti. Jıyn-terim naýqanynyń sońyna deıin Myrzashólde 200 myń tonnadan astam aq maqta jınaý kútilýde.
