Sozaq aýdanynyń aýyl sharýashylyǵy salasyn sóz etkende ásirese, osy salany damytýǵa memleket tarapynan berilip jatqan nesıeden bastaǵan jón sekildi. Sebebi munda mıkronesıelik uıymdar arqyly kásipkerlerge tómengi paıyzdy qaryzdar berilýde. Údemeli ındýstrıaldy-ınnovasıalyq damý baǵdarlamasynyń salalyq jobasy «Jumyspen qamtý - 2020» baǵdalamasynyń ekinshi baǵytyna qyzyǵýshylar qatary artqan. Mamandar «Jumyspen qamtý-2020 Jol kartasy» baǵdarlamasy aıasynda nesıe alǵysy kelgenderdiń basym bóligi mal sharýashylymen aınalysýdy qalaıtyndar deıdi. Sonyń biri Sozaq aýdanynyń turǵyny jeke kásipker Qaırat Ashımov. Ol óz isin keńeıtý maqsatynda (iri qara mal, sıyr baǵý, et óńdeýge) nesıe alý úshin aýdandaǵy Jumyspen qamtý ortalyǵyna qujattar tapsyrǵan. Ekinshi baǵytqa jaýapty maman qujattaryn qabyldap, nesıe alý úshin “Aýylsharýashylyǵyn qarjylaı qoldaý” AQ qoryna joldama bergen. Kaırat Ramazanuly “Aýylsharýashylyǵyn qarjylaı qoldaý qory” AQ – nan 2016 jyly sáýir aıynda eki mıllıon teńge nesıe aldy. Baǵdarlama boıynsha alǵan nesıe aýyldaǵy kásipkerlerge úlken kómek beretindigine rızashylyǵyn aıtady.«Baǵdarlamaǵa qatysqanym úshin sheksiz rızamyn. Sonyń arqasynda jeke sharýashylyǵymdy damytyp, joǵary tabysqa qol jetkizýdi maqsat etip otyrmyn»,- kásipker.
OQO jumyspen qamtýdy úılestirý jáne áleýmettik baǵdarlamalar basqarma basshysynyń orynbasary Sátjan Polatovtyń málimetinshe oblysta bıyl «Jumyspen qamtý - 2020» baǵdarlamasy aıasynda 50 myńǵa jýyq adamdy qamtý josparlanǵan. «Baǵdarlama sheńberinde bilim barlardy, bilimi joqtardy qaıta daıarlaýdan ótkizip, sonymen qatar jumys izdeýshilerdi shaǵyn nesıeler arqyly jumyspen qamtýǵa múmkindik bar»,- deıdi ol.
Aıta keteıik, «Jumyspen qamtý 2020 jol kartasy» baǵdarlamasynyń basty maqsaty turaqty, nátıjeli jumyspen qamtý, halyqtyń ál-aýqatyn kóterý jáne kedeıshilikpen kúresý, memlekettik qoldaý sharalaryn kórsetý bolyp tabylady. Al baǵdarlamanyń ekinshi baǵytynyń sıpaty : aýyldaǵy kásipkerliktiń damýyna kómek kórsetý. Kásipkerlikti yntalandyrý azamattardyń jeke isin uıymdastyrý nemese keńeıtý arqyly olardyń ekonomıkalyq belsendigin arttyrýǵa baǵyttalǵan.
