«Agrobıznes 2020» baǵdarlamasy aıasynda jasalyp jatqan memlekettik qoldaýlardyń arqasynda búginde aýyl sharýashylyǵy taýarlaryn óndirip, el ekonomıkasyna qyzmet etip ári óz turmysyn da túzep jatqan azamattar kóp. Solardyń biri Maqtaral aýdany Dostyq aýyl okrýgine qarasty Gúlistan eldi mekeninde turatyn Mahmýd Sýbhanov esimdi azamat. Bul týraly okg.kz saıty jazdy.
Mahmýd Sýbhanovtyń mal bordaqylaý isin qolǵa alǵanyna onsha kóp ýaqyt bola qoımapty.
— Ózimizdiń sýarmaly jerimiz bolǵandyqtan, jylda qaýyn, maqta egýmen aınalysyp júrdik. Qansha degenmen, ónimniń barlyǵyn túgel satyp jibere almaısyń. Egistikte qalyp qoıǵan qaýyn, qarbyz, maqta qaldyqtaryn ysyrap etpeı, bir kádege jaratýdyń joldaryn izdestire bastadym. Oılana kele, munyń eń utymdy tásili mal bordaqylaý dep oıladym. Mal basyn kóbeıtý úshin «Yrys» mıkroqarjy uıymynan byltyr 6 mıllıon teńge nesıe aldym. 7 paıyzdyq mólsherlememen 3 jylǵa bólip tóleıtindeı etip, kelisimshart jasadyq. Alǵan qarajatymyzǵa on ógiz, on buzaý, bes sıyr alyp, kásibimizdi bastadyq. Kúzde biraz ógizderdi semirtip, baby keliskenderin bazarǵa shyǵaryp sattyq. Nátıjesi jaqsy, bir ógizdiń baǵasy 300 myń teńgege deıin bardy. Sonyń arqasynda nesıemizdiń biraz bóliginen qutylyp úlgerdik. Ieligimizde 45 gektar jerimiz bar. Sondyqtan mal jem-shóbiniń 50 paıyzy ózimizden shyǵady deýge bolady. Dál qazirgi ýaqytta fermamyzda 20 bas iri qara mal bar, onyń 10-y saýyndy sıyr. Kúnine shamamen 30-40 lıtrdeı sút alamyz. Sebebi, barlyq sıyrdy saýa bermeımiz, keıbirin buzaýlary aıaqtanǵansha tóline beremiz. Bazarǵa sút, aıran, súzbe aparyp satamyz. Munda eki adam jumyspen qamtylǵan. Olardyń jalaqylaryn ýaqtyly tólep otyramyz. Keleshekte qora-jaıymyzdy keńeıtip, jem-shóp jınaıtyn bólek keń oryn salsaq dep josparlap otyrmyz, —deıdi S.Mahmýdov.
Resmı málimetter boıynsha jyl basynan beri Ońtústik Qazaqstanda fermerlerge «Yrys» qarjylandyrý uıymy arqyly tómengi paıyzben 486 jobany qarjylandyrylýǵa 1,2 mlrd. teńge kóleminde nesıe berilgen. «Sybaǵa», «Altyn asyq», «Qulan» baǵdarlamalarymen 35 myńnan asa mal basy satyp alyndy.
