Taǵy da terrorıster qandy qyrǵyn sala jazdady! Ulttyq qaýipsizdik komıteti bul joly Almatynyń kúlin kókke ushyrmaq bolǵan 3 lańkestiń qolyna kisen salyp, joıqyn jarylystyń aldyn aldy. Jat dinge shyrmalyp sanasy ýlanǵan radıkaldar polısıa, prokýror men sýdıalardy nysanaǵa alǵan eken, - dep habarlaıdy Qamshy.kz KTK-ǵa silteme jasap. 

Alaıda arnaıy qyzmet qaskóılerdi der kezinde quryqtap, halyqty taǵy bir ajaldan aman alyp qaldy. Ustalǵandardan jarylǵysh zattar men terakt jasaýǵa úndeıtin ekstremıstik materıaldar tabylǵan. Anyǵy - lańkester Almatynyń birneshe jerinde polısıa, prokýratýra men sot ǵımarattaryna shabýyl jasaýǵa tyńǵylyqty ázirlenipti. Biraq, josparlaryn aldyn-ala bilip qoıǵan Ulttyq qaýipsizdik komıteti jarylysty boldyrmaı tastady. Al, bıyldyqqa arnaıy qyzmet el boıynsha oıran salmaq bolǵan 70-ten astam radıkaldy toptyń jolyn kesken. Sonda da qaýip seıilmeı tur. Óıtkeni oblys ortalyqtaryndaǵy halyq kóp jınalatyn qoǵamdyq oryndar, bazar men saýda oryndaryna kez-kelgen sátte terrorıster basyp kirýi ábden múmkin. Buǵan ǵımarattardyń jóndi qorǵalmaýy sebep.