Qadirli oqyrman! 

Portalymyzda jarıalanǵan "Arandatýshynyń artynda kim tur?" degen maqalaǵa qatysty resmı túsinik berýdi jón sanaımyz! Birden aıtý kerek, ótken senbi kúni jarıalanǵan ol maqala redaksıanyń kózqarasyn bildirmeıtin, mańyzdy eldik máselege qatysty qaramaı-qaıshylyqqa toly jazba. Elektrondy poshtaǵa kelgen kóp materıaldyń birin senbi kúni kezekshilikte bolǵan jas qyzmetker máseleniń mánisine barmastan jarıalap jibergeni anyqtalyp otyr. Anyqtala salysymen ol materıal saıttan óshirildi. Sonymen qatar, álgindeı saryndaǵy negizsiz aıyptaýlardan turatyn maqalalar ózge de aqparat quraldaryna joldanǵany belgili bolyp otyr. Tipti, áleýmettik jelide áldebir toptar osy baǵytta maqsatty túrde jumys istep otyrǵandaı áserde qaldyq. 

Redaksıanyń ustanymyn bildirmeıtin materıaldyń jarıalanýyna kináli birneshe qyzmetker shyǵarmashylyq ujymnyń ishki erejelerin buzǵany úshin tártiptik jazaǵa tartyldy! Maqaladaǵy jaıttarǵa qatysty aıtarymyz – ol redaksıanyń ustanymy emes. "Qamshy" portaly el aýmaǵynda jer reformasyna qatysty barlyq narazylyq sharalaryn ashyq, tolyqqandy jarıalap otyrýǵa tyrysty. Osyǵan deıin qazaq halqynyń batyr uldary Maks pen Talǵatqa bostandyq berilýin talap etken birneshe materıal da jarıaladyq. Bul baǵytta eshqandaı shekteý bolǵan emes. Jer men til, din máselesinde redaksıa ustanymy aldaǵy ýaqytta da ózgermeıdi.  

Oryn alǵan qolaısyz jaıtqa baılanysty oqyrmandardan, jer men el taǵdyryna alańdaýly barsha aǵaıynnan keshirim suraımyz. Atyraýdaǵy jer mıtıńisin uıymdatyrǵan jigitterdiń soty ádildik qaǵıdalaryna saı ótip, azamattardyń tezirek otbasyna oralýyna tilektespiz! Saıttyń redaktory retinde jeke óz atymnan álgi maqalasymaqta aıtylǵan jaılar úshin qos azamattan, olardyń týystary men dostarynan, jer taǵdyryna beıjaı qaramaıtyn barsha azamattardan keshirim ótinemin. 

"Qamshy" portalynyń bas redaktory: Darhan Muqantegi